Paglapas sa kalikopan

Human sa pagkasira sa isla sa Boracay sa niagi nga mga semana, ang Cebu na usab ang nasampolan sa otoridad sa gihingusgan nga kampanya sa kagamhanan batok niadtong mga resort sa nasud nga hagbay ra nga milapas sa balaod pagprotehir sa kalikopan.

Atol sa inspeksiyon sa mga opisyal sa Department of Environment and Natural Resources, nahibaw-an nga daghan sa mga resort sa lungsod sa Oslob, sa southern Cebu, ang nakalapas sa lagda sa 20-meter easement gikan sa baybayon.

Delikado nga sirad-an ang 67 ka resort sa mao nga lungsod kansang mga estraktura ang nakit-an kuno sa DENR nga milapas na ngadto sa dagat. Hinuon, mihimo na og dugang pakisusi ang mao nga ahensiya ug misaad kini og legal nga proseso batok niadtong mga resort.

Bisan pa sa pasalig sa otoridad nga dili gayud maapektohan ang industriya sa turismo sa mao nga lungsod, dili nato ikalimod nga molurang gayud ang mao nga sektor. Kini ilabina kon momenos na ang kadangpan sa mga turista kon sirado na unya kadtong mga resort nga giingon nga milapas sa balaod.

Ang Oslob usa sa labing bisitahon nga tourist destination dinhi sa Central Visayas. Gani ang mao nga lungsod maoy ikaduha sa labing bisitahon sa mga lokal ug langyaw’ng mga turista sa Sugbo. Nag-una sa mga tourist spot sa lalawigan mao ang isla sa Mactan.

Lisud usab sabton ngano nga karon lang nadiskitahi sa otoridad ang kahimtang sa mga resort didto sa Oslob. Hagbay ra kadto nga mga estraktura nga mitubo sa daplin sa baybayon sa maong lungsod apan wala gyu’y mibuyag niini sulod sa taas nga panahon.

Kay kon wala pa si Presidente Rodrigo Duterte nagsige og yawyaw sa niaging mga bulan mahitungod sa kahugaw na sa inila nga isla sa Boracay, dili usab mabutyag ang giingon nga mga paglapas sa mga resort sa Oslob.  Klaro nga nagmika sa ilang trabaho, sukad pa kaniadto, ang uban nga mga opisyal sa departamento sa kalikopan dinhi sa lalawigan. Kay kon kugi pa sila sa monitoring sa atong mga resort, dili unta makalapas sa balaod kining mga resort sa Oslob ug uban pa’ng lugar sa probinsiya.

Apan sa lain nga bahin, magsilbe usab nga leksiyon sa mga resort owner ang nahitabo karon didto sa Boracay ug Oslob, nga dili gayud angay nga isakripisyo ang kaalaotan sa kalikopan tungod lang sa kahakog sa salapi.