Mga kinabuhi nga nasayang

Laing duha ka kinabuhi ang nakalas sa dako nga sunog sa Barangay Ermita dakbayan sa Sugbo niadtong Lunes sa buntag.

Napaig ang magsuong mga bata, nga nag-edad pa og 9-anyos ug 2-anyos, sa maong trahedya nga miugdaw usab sa daghang kabalayan.

Ang hinungdan mao ang stove nga de-bomba nga giayom-ayom lang ug gigamit sa pagluto. Bahala unta kon nangaabo ang mga kabtangan basta wala lang gyud unta’y nakalas nga kinahuhi.

Ang mga butang makita ra man, ang kinabuhi dili na gyud mabalik, makapahilap sa kasing-kasing ang nahiagoman sa mga bata nga nakalas.

Niadtong niaging semana lang, usa usab ka 45-anyos nga lalaking baldado ang napaig sa sunog sa ilang balay sa Barangay Pusok, dakbayan sa Lapu-Lapu.

Wala siya masalbar sa iyang mga igsuon kay bug-at kuno alsahon sanglit bedridden naman ang lalaki.

Niadtong nakalabay nga buwan, napaig usab ang 3-anyos nga babaye sa sunog sa ilang pinuy-anan sa Barangay Maribago, dakbayan sa Lapu-Lapu.

Nakaangkon usab og grabeng paso sa lawas ang iyang mga igsuon, ilabi na ang kamagulangan nga maoy nagluwas sa uban niyang mga manghud.

Samtang sa dakong sunog nga miigo sa Sitio Paradise, Barangay Pajo, sa samang dakbayan napaig usab ang duha ka magsuon nga dos ug kwatro-anyos.

Nagdula kuno sila og pusporo nga maoy nakaingon sa sunog nga milamoy usab sa daghan nga kabalayan.

Kon sumadahon moabot na sa unom ang namatay sa mga nahitabo nga sunog sa unang quarter lang ning tuiga.

Kasagaran mga bata, usa lang ang hamtong apan baldado, sila pulos wala’y ikasarang o helpless sa pagpanalipod sa ilang kinabuhi.

Ang unang motan-aw sa kaluwas sa mga anak, o mga tawo nga vulnerable sa disgrasya mao ang pamilya.

Unta sa mga himoong fire drill, hatagan og gibug-aton ang pagluwas sa kinabuhi sa mga tawo aron magamit kon mahitabo ang gikahadlokan nga sunog.

Bahala na lagi kon mahurot kaugdaw ang mga butang basta wala’y masayang nga kinabuhi.