Ang makadaot sa relasyon

Atong naobserbahan nga ang mga tawo nga nagpuyo karon sa modernong panahon, wala na kaayo mohatag og bili sa kabililhon sa malampuson nga relasyon sa panagtiayon. Daghang magtiayon nga magbuwag lang dayon kon magkasiloay.

Nakaingon kita niini, tungod kay ning ulahing mga dekada, ingon sa inanay’ng nawala ang kredibilidad sa kaminyuon ug ang iyang kasagrado, o kabalaanon. Sigun sa mga eksperto, sagad sa mga batan-on karong henerasyona, maglisud gyud sa paghimo og komitado, o matinud-anon sa ilang kapares sa kinabuhi.

Sa malampusong relasyon sa panagtiayon, nagkinahanglan kini nga ang matag usa, masinabuton ug maunongon. Ania sa ubos ang mga sagad sayop, nga inanay’ng moguba sa maayong relasyon.

* Pagpaabot og kausaban sa imong pares nga mabag-o tungod kanimo – ang tagsatagsa kanato, adunay gyu’y tawhanong kahuyangon, ug ang matag tawo nagbaton og iya-iya nga namat-ang kinaiya. Ayaw gyud pagpaabot nga maperpekto siya alang sa imong gusto nga mahitabo. Gani, bisan nakaandam siya nga mabag-o, sa ngalan sa gugma, imo siya dawaton nga hingpit, unsa man ang iyang katibuk-an nga pagkatawo.

* Gusto nga mao gyu’y modaog sa mga argumento - adunay mga tawo nga mahilig moaway, o makig-ergo, aron ipamatuod nga sila husto ug maoy gusto nga modaog, o dili palupig. Gumikan kini sa rason nga aghat sa ilang garbo (ego), nga maoy gipatigbabaw sa kaugalingon. Sa pakig-ergo diha sa imong kapikas, tinguhaon ang pagkalma nga ipresentar nga diplomasya  aron mahusay ang alang sa ikalig-on sa relasyon.