Kampanya na!

Karong adlawa maoy opisyal nga pagsugod sa campaign period sa mga kandidato sa barangay ug Sangguniang Kabataan (SK) elections.

Apan ulahi naman kaayo ning gitakda nga petsa sa Commission on Elections (Comelec) kay hagbay ra man nga nangampanya ang mga kandidato.

Pormalidad na lang kini ang starting line sa kampanya tungod kay wala man nila mapugngi ang mga kandidato nga dugay ra nga nagsige’g pangulitawo sa mga botante.

Dinhi nato makita kon unsa ka bentahoso ang mga kandidato aron maseguro nga sila modaog.

Sa kampanya pa lang daan, manikas na, gilipat ang Comelec, samot na kon makalingkod sa pwesto.

Niining panahona, ‘visible’ kaayo kining mga tawhana kinsa tam-is kaayo og pahiyom nga manglamano sa mga tawo, gani mamaryente pa, o angkunon dayon nga kadugo ang mahimamat nga botante.

Apan kon makadaog na gani, panagsa ra gyud kaayo moatubang sa mga tawo, ug ang secretary sa barangay na lang ang frontliner kanunay kay si kapitan duna kuno’y gilakaw.

Mas luoy kadtong anaa sa mga isla kansang mga opisyal nagpuyo ug nagnegosyo sa mainland kay makit-an sila panahon ra seguro sa election period.

Ang katawhan dugay na nga nahigmata niining bulok nga sistema apan gipiyong lang gihapon nila ang ilang mga mata, ilabi na kon mataptapan ang mga mata og kwarta.

Ang uban dali ra kaayo malukmay sa tam-is nga pulong gikan sa dila sa bakakon nga mga politiko.

Kini ang hinungdan nga dili nato maangkon ang kausaban kay kita ra man sab ang nagpili sa atong kapalaran.

Unta isip botante, pamation ug tan-awon nato ang kamatinud-anon sa mga tawo nga atong pilion nga moserbisyo alang sa interes sa katawhan.