Isagol sa kape, nagbusyad mohiyos

Malipay kaayo niini kadtong hinginom og kape sa buntag, ilabi na kadtong grabe na kadako og tiyan nga nagbusyad sa katambok.

Dili gayud malalis nga ang kape, labi na og organik, dili instant, kanang lutuon pa, imong mahanggap ang natural nga aroma sa mga nutrens nga nabatonan sa kape.

Nauso na sa tibuok kalibutan ang pag-inom og kape, apan dili lang gayud nga magpalabi niini, nga mora na lang og ihinubig sa tibuok adlaw.

Ang pag-inom og kape nga igo (1-3 ka tasa) lang kutob sa udto, makasustiner na nga dili kita maluya sa nahibiling oras sa kombati.

Kay pinaagi sa kape, dihadiha dayon masinati mo nga motaas ang lebel sa imong enerhiya, aron magamit sa tibuok adlaw nga dinumogay sa paningakamot ning kinabuhia.

Kini dugang pa sa daghang makuha nga benepisyo sa lawas, sama sa pagpataas sa lebel sa metabolismo, basta dili lang palab-anan.

Makatabang sab ni nga kanunay’ng lig-on ang kasingkasing.

Apan, pipila lang ang nasayod nga ang pagkape sa buntag sa dili pa mamahaw, mahimo kini nga gamhanan sa pagpahiyos sa nagbusyad sa katambok ang tiyan.

Kini pinaagi lang sa pagdugang og mga komon nga ingrediyentes sama sa coco oil, cinnamon powder ug honey ngadto sa kape nga nakaandam na sa tasa.

Human lang sa duha ka higayon nga paghigop sa kape nga sinagolan na niini, imo na mabatyagan nga mogaan og pipila ka libras ang tambok sa tiyan mo.

Matud pa sa mga nakasulay na, ilabi na sa mga babaye, pabalikon niini ang seksi nga porma sa lawas nga dili na maghimo’g kausaban sa estilo (lifestyle changes), ilabi na sa pagpili, o pagkontrol sa pagkaon.

Hinuon, mas bentaha gayud nga magpakabana kita kanunay sa atong mga bulohaton nga makaayo ug makapahimsog sa atong lawas, inay nga atong abusohan.