EDITORYAL - Dili kay kutob ra pag-ihap sa ganansya
Karon nabatyagan na ang pagpamalhin sa mga langyaw nga turista dinhi sa Central Visayas, ilabi na sa Lapu-Lapu City, nunot sa pagsirado sa Boracay subay sa mando ni Presidente Duterte. Nagpasabot kini nga mosaka ang ekonomiya sa mga lugar sa Central Visayas nga adunay mga tinagoang maanindot, apan dili kaayo sikat nga mga beach resorts ug uban pa nga tourist spots.
Maayo kini tungod kay daghan unyang mga negosyo, ginagmay man ug dinagko, moasenso gyud nunot niining pagdagsa sa dugang pa nga mga turista, samtang sirado pa ang kabaybayonan sa Boracay sulod sa unom ka buwan. Apan ang pagdagsa sa mga turista dinhi sa Central Visayas, dako kining hagit sa kapolisan sa pagsiguro sa ilang kaluwasan tungod kay kining maong mga bisita nagdala man og kwarta nga makapatental sa mga badlungon sa katilingban.
Importante gyud nga ang LGUs ug kapolisan maniguro alang sa ilang kaluwasan aron ganahan pa sila sa pagbalik-balik dinhi sa ato. Gawas sa seguridad, angay usab nga siguroon ang kalimpyo sa atong kabaybayonan aron dili nato masinati ang nahitabo sa Boracay. Ang ubang opisyal sa kagamhanan usahay makalimot sa ilang kaakohan pagpanalipod sa atong kalikupan. Ang LGUs kinahanglang maghimo na daan og mga ordinansa nga makasuporta sa turismo sa ilang tagsa-tagsa ka lugar aron makaangkon og malungtarong benepisyo ang ilang mga lumolupyo.
Apil na niini ang pagpatuman gyud sa mga environmental laws ug kon gikinahanglan, maghimo gyud og mga lokal nga ordinansa pahaom sa sitwasyon sa ilang lugar. Sa laktod nga pagkaestorya, dili lang unta kutob sa pag-ihap sa ganansya ang buhaton sa mga stakeholders sa turismo, kon dili, hasta ang pagsiguro nga molungtad kini pinaagi sa proteksyon sa tinubdan sa maong kita, sama sa mga tourist spots.
- Latest