Pasiunang hulagway sa eleksiyon sa 2019

Nag-iyahay og pangangkon ang kampo sa Bando Osmeña Pundok Kauswagan (BOPK) ug ang BARUG-Team Rama nga maoy dunay mayoriya sa mga kapitan.

Unang nangangkon si Mayor Tomas Osmeña nga dunay mga sakop sa BARUG nga gustong mobalhin sa BOPK, apan gihimakak ni Bise Mayor Edgardo Labella. Hinuon, matud ni Labella, ang mga sakop sa BOPK maoy gustong mamalhin sa ilang grupo.

Sa kasamtangan, dunay 65 ka kapitan ang BARUG ug 15 lang ang BOPK. Apan wala ta masayod kinsa nila ang magpabiling loyal sa ilang tagsa-tagsa ka grupo sa nagsingabot nga eleksiyon.

Dili malalis nga dihado sa tapad ang BOPK sa pagkakaron, bisan diha sa konseho tungod kay samtang tag-walo sila ka konsehal, apan ang presiding officer nga maoy tigbuak sa table, sakop man sa oposisyon.

Busa, importante ang umaabot nga barangay ug Sangguniang Kabataan elections alang sa BOPK, aron makuha ang mayoriya sa konseho sanglit ang mga modaog nga kapitan ug SK magpili man og ilang representante didto sa konseho isip ex-officio member.

Nunot niini kinahanglanon gyud sa BOPK nga ilang makuha ang duha ka lingkoranan sa konseho aron makuha ang mayoriya. Mosugot ta ug sa dili, ang umaabot nga eleksiyon sa barangay magsilbi gyud nga extension sa sangka nilang Osmeña ug kanhi mayor Michael Rama.

Dinhi masukod kon may liderato pa ba si Rama. Sa samang higayon, magsilbi sab ni nga pasiunang talan-awon sa politika sa dakbayan sa Sugbo sa midterm elections sunod tuig.

Ang umaabot nga eleksiyon sa barangay magsilbi sab nga sukdanan sa oposisyon kon duna ba sila’y dag-anan kang Osmeña sa 2019.

Busa nag-iyahay og pangangkon ang duha ka habig nga sila maoy duna’y mayoriya, apan pulos haguka ug wa’y kapuslanan kay dili importante kinsa kanila ang dunay daghang sakop karon.

Ang tinuod nga taksanan kinsa nila ang tinuod nga gamhanan mao ang resulta sa piniliay. Kini tungod kay dinhi masukod hain sa duha ka grupo ang modominar sa konseho.