EDITORYAL - Mga botante ra ang mag-igo

Makaalarma kining gibutyag sa PNP ug PDEA dinhi sa rehiyon nga adunay kapin sa 20 ka narco-politicians nga niduso og certificate of candidacies alang sa piniliay karong Mayo 14. Ang ilegal nga drugas pa ang nakita. Kinsa kaha sab sa mga mi-file og COC ang nalambigit sa illegal gambling? O kadtong mga tigpaluyo niini? Kay kon tinuod kini, nagpasabot diay nga bisan pa man sa posibilidad nga madakpan sila ug mauwawan ang ilang pamilya, wala sila manumbaling ug gusto pa nilang makaangkon og gahum.

Kon kining mga tawhana makadaog ug makalingkod sa pwesto, unsa may mapaabot nga serbisyo sa ilang mga konstituwente? May mga plano ba sila nga kaayohan para sa ilang mga konstituwente, o para lang sa pagpalambo sa ilang negosyo sa ilegal nga drugas? Apan subo kaayong paminawon nga bisan pa tingali og ipublikar ang mga pangalan niining mga tawhana aron ipahibalo nga sila nalambigit sa ilegal nga drugas, daghan gihapon ang mobotar kanila.

Bisan tuod og gipangusgan na ang kampanya kontra sa ilegal nga drugas, apan may mga botante pa gihapon nga modawat og kwarta bugti sa ilang boto, kay ang uban wa na kaayo’y pagsalig sa sistema. Sama niining isyu kabahin sa premature campaigning, ang Comelec miangkon nga dili nila mahimong bantayan ang tanang ilegal nga buhaton sa mga kandidato ug gisalig na lang nila ang tanan sa publiko. Ang mga botante ra gyud ang mag-igo kon botaran ba kining mga kandidatong badlungon ug nalambigit sa ilegal nga mga kalihokan.

Apan kon ang mga botante wa sa’y pagpakabana, aw dili layo nga makalingkod gyud sa pwesto kining mga badlungon sa katilingban ug may dugang pa nga gahum nga mahimo nilang gamiton sa pag-abusar.