LRT angay na gayud ipatuman

Migimok na usab ang plano pagtukod og light rail transit (LRT) system dinhi sa Metro Cebu.

Usa ka consortium nga gilangkoban sa langyaw ug Filipino nga mga kompaniya ang gusto nga motukod niini sugod sa sunod tuig, sa kantidad mga $3 bilyones.

Ang nakanindot niining mao nga proyekto kay dinhi sa dakbayan sa Sugbo anaa sa ilawom mag-agi ang mao nga LRT ug dili kaayo kini makabalda sa naghuot na nga mga karsada.

Gawas sa dakbayan, sa itaas na mag-agi ang railway padulong sa dakbayan sa Carcar sa south ug sa dakbayan sa Danao sa norte.

Alang kanako, hinaot nga madayon gayud kini nga proyekto.

Dako unya kini og ikatabang sa lakang pagsulbad sa problema sa trapiko nga grabe na nga milapdos kanato dinhi sa Metro Cebu. Kini gawas pa nga ma-modernize na usab ang sistema sa transportasyon dinhi.

Sayang ngano nga wala matukod sa una kining mao nga klase sa transportasyon. Dili na unta kita karon magsagubang sa kahagip-ot sa sitwasyon diin ang pagkawalay maayo nga mass transport system nahimo karon nga dako nga maldisyon sa mga Sugboanon.

Adunay giduso nga proposal alang sa pagtukod og LRT sa Metro Cebu si kanhi Kongresista Eduardo Gullas sa unang distrito sa lalawigan kaniadto pa’ng dekada nuybenta.

Nindot unta kadto nga plano niadtong panahona nga wala pa motumaw ang dako nga problema sa trapiko.

Apan wala kadto matuman tungod lagi sa pagbabag sa pipila sektor ug politiko, ilabi na ni Mayor Tomas Osmeña, kinsa dili gusto nga motadlas ang LRT sa dakbayan sa Sugbo.

Ang resulta, maayo ang pagkaguba sa kamada ug nakalimtan sa dayon ang mao nga plano ni Gullas.

Karon, ang ordinaryo nga mga Sugboanon, nag-antos na hinuon sa kakulang sa maayo nga sistema sa transportasyon sa Sugbo.

Kon natuman pa unta kadtong mao nga proposal ni Gullas, dili na unta maglabad ang atong mga ulo sa sigeng konsimisyon sa dako nga problema sa trapiko.

Hinaot nga matuman gayud ang implementasyon sa LRT dinhi sa Metro Cebu. Nagkinahanglan kita niini karon alang sa umaabot pa nga katuigan.

Sa ka highly-urbanized sa Metro Cebu, nagkinahanglan gayud kini og world class nga mass transport system sama sa LRT.