DENR dili seryuso

Dili layo nga mahitabo sa Mactan island dinhi sa Sugbo, ug sa isla sa Panglao, Bohol ang nahitabo sa Boracay nga gikatakdang sirad-an sunod semana alang sa rehabilitasyon.

Ang Department of Environment and Natural Resources (DENR) miingon nga kon dili mapugngan ang pagkatap sa hugaw sa maong suroyanan sa mga turista, hayan mao kini ang mosunod sa isla sa Boracay.

Ang pamahayag migawas human nga gitug-an sa mga opisyal nga gitahasan sa pagpakabana ug pagpanalipod sa kalikopan nga taas ang coliform level, o bakterya sa dagat, sa nahisgotang mga dapit, labi na gayud sa Mactan.

Si DENR Undersecretary Jonas Leones miingon nga mihatag na og direktiba si DENR Secretary Roy Cimatu sa ilang mga rehiyonal nga buhatan nga tutokan ug limpyohan ang mga dapit nga suroyanan sa mga turista diha sa ilang hurisdiksyon.

Nasayran nga bisan ang El Nido sa Palawan nahatagan na usab og “show cause order” tungod sa taas nga level sa bakterya nga gikan sa hugaw sa tawo.

Mas maayong masayran ni Secretary Cimatu nga dili seryuso ang DENR dinhi sa rehiyon-7 sa pagpanalipod sa kalikopan tungod kay gipasagdan lang niini ug nagpiyong ra ang iyang mga opisyal sa nanurok nga mga building nga anaa na gyud sa dagat gitukod.

Ang pagmentinar sa dagat aron kanunay nga limpyo maayo, apan dili lang tingali kutob ra sa dagat, iapil pud unta ang pagpanglimpyo sa kabaybayonan.

Kini aron nga ang lapyahan puyde nga matagoan sa mga sea creatures ug aron gawasnon pa sila nga makadagan-dagan sa daplin sa dagat. Limpyohan unta ang kabaybayonan pinaagi sa pagpangibot ug pagpangguba sa mga estraktura nga gitukod duol ug kadtong anaa na gyud sa dagat.

Tungod sa mga estraktura nga gitukod duol ug kadtong naa na gyud sa dagat, dili na libre ang pagpangaligo sa dagat. Ang dagat nga para sa tanan nahikaw na kini sa mga dili makabayad.