Ehersisyo sa dagway nga nagbitay

Tingali, nakaobserbar na kita nga dunay mga tawo nga bisan og batan-on pa, apan imong makita nga sama na kini sa tigulang kaayo tan-awon ang nawong.

Makaingon kita niini kay ang agtang dagko og kunot nga nidailos sa kilay, unya ang mga mata nanglu’y nga nabug-atan sa tabon-tabon.

Dugangan pa sa aping nga nanglus-ag ug nagbitay ang panit.

Nasayod ba kamo nga dunay espesyal nga ehersisyo niini aron mahibalik sa normal nga himsog, o piskay ang nawong ug molutaw ang kabatan-on?

Ang ‘California Dental Specialty Group,’ adunay gihimo nga ‘smile exercises’. Mopahugot kini sa panit ug makapaundanon sa dapit sa palibot sa nawong, labi na sa baba, nga nagkontrol sa presyur sa imong pagpahiyom. Ingon niini lang ang buhaton sa smile exercises:

Sugdan kini nga nag-atubang sa salamin, nga nakarelaks ang nawong. Unya inanay mopahiyom, nga iunat palapad ang baba, ug itak-om  ang mga ngabil sulod sa 10 segundos. Sunod, mas unaton pa ang pahiyom nga makita ang ngilit sa ngipon, sulod gihapon sa 10 segundos.

Sa katapusan, mas mopahiyom nga kutob sa maunat ang baba nga motisar pag-ayo, nga makita ang tanang itaas nga bahin sa ngipon, nga dili makita ang lagos. Ning higayona makasinati ka nga nag-uylap-uylap na ang imong apapangig. Pugngi kini sulod sa 10 minutos, ug inighuman morelaks.

Sugod pa lang kini sa unang katunga nga bahin sa ‘smile exercises’. Mora og kaugtason kita niini, kay nabag-ohan man ta. Apan sa kadugayan maanad ra kita niini, ilabi na kon makab-ot na nato ang maayong resulta, nga mahibalik sa kabatan-on ang panagway.

Simple og sayon ra kini buhaton, kusog ra ang puhonan niini. Apan nagkinahanglan lang kini og antus, sakripisyo ug seryuso nga disiplina sa paghimo niini nga makapahingangha nga epekto sa ‘smile exercices.’