Krisis sa kredibilidad
Labihang nindota sa pahiyom ni Cebu City Mayor Tomas Osmeña dihang ang director general sa Philippine Drug Enforcement Agency (PDEA), miangkon nga wa’y ebidensiya pagmatuod sa pasangil ni Justice Secretary Vitaliano Aguirre II nga ang mayor protektor sa ilegal nga drugas.
Alang ni Osmeña maisip ni nga pag-abswelto kaniya. Ang pamahayag ni PDEA director general Aaron Aquino gisuportahan sab sa kapolisan. Si PNP chief Ronald dela Rosa miangkon nga wa say ebidensiya, o bisan report na lang nga nadawat ang kapolisan batok ni Osmeña.
Kon wa’y ebidensiya, o bisan report na lang nga nadawat ang kapolisan ug PDEA mahitungod sa giingong kalambigitan ni Osmeña sa drugas, posible kaha nga imbento lang ni Aguirre ang pasangil?
Matud ni Aguirre nga ang ig-agaw sa napatay nga gipasanginlang drug lord nga si Jeffrey “Jaguar” Diaz maoy milambigit sa mayor. Si Reynaldo “Jumbo” Diaz mipasangil kuno ni Osmeña nga midawat og P7 milyones gikan ni Jaguar.
Ang pangutana, nganong gitagoan ni Aguirre ang maong kasayuran gikan sa kapolisan ug PDEA? Kon 2016 pa nga giluwatan ni Jumbo ang affidavit, nganong wala iduso ni Aguirre ngadto sa PDEA ug kapolisan ang maong kasayuran aron maimbestigar ug ang posible nga pagpasaka og kaso?
Nganong gihuwat ni Aguirre nga magkabingkil sila ni Osmeña una ipahibawo ang maong kasayuran? Ang labing dako nga sipyat ni Aguirre mao ang kapakyas niya pagtugyan sa maong inpormasyon ngadto ni Presidente Rodrigo Duterte. Posible unta tingali nga nalakip ang pangalan ni Osmeña sa mga pangalan nga gibulgar ni Duterte isip mga protector sa drugas.
Karon, dili kalikayan ang pagduda nga iyang giimbento ang pasangil agi og panimawos ni Osmeña human siya gipasanginlan sa mayor nga protector sa mga tax evaders. Kon gihimo pa ni Aguirre ang iyang trabaho, dili unta siya mag-atubang niining krisis sa kredibilidad sa pagkakaron.
Karon, gidungog nga si Aguirre maoy sunod nga taktakon ni Duterte tungod sa daghan niyang palpak. Kon mahitabo nga tinuod ang maong kasayuran, si Osmeña maoy dunay labing lanog nga bahakhak. Posible pa ni nga magamit sa mayor nga propaganda aron ipakita ang iyang inpluwensiya ngadto sa presidente bisan dili sila kapartido.
- Latest