Dili angay’ng buhaton sa pagtanom og utanon (2)

Ang pagtanom sa mga dapit nga landong kay nasalipdan sa mga kahoy ug halos wa na’y kahayag sa adlaw nga molusot ngadto sa mga tanom, dili maayo kay dili na kini makasikad pagtubo ug dili makalabong ang mga tanom.

Dunay tanom sama sa ‘peas’ o ‘lettuces’, kontento na mabuhi bisa’g makadiyot, o tipik lang sa kahayag, apan kadaghanan sa tanom, mohimsog kini kon direkta nga nakabantang sa silaw sa adlaw.

Bentaha na kini nga mainitan sa buntag, hinuon kon tibuok adlaw man mainitan, apan bugnaw ug mahangin ang dapit, makapuypoy kini sa tanom nga dili malawos, ug makatabang usab ang kadasok sa mga dahon kay motuhop ug kamenosan man ang kaigang.

Kinahanglan nga una tamnan ang yuta, andam usa ang yuta, bugwalon, limpyohan ug ilahugay nga masagol ang yuta ingon man ang mga nadugtang kompost sa mga sagbot ug mga hugaw sa mananap.

Bisan og natamnan na, kanunay kini nga butangan og compost, aron motambok kay wa ni kuyaw bisa’g masubraan. Ang pagbisibis ug tubig usa ka maayong gawi sa pag-atiman sa tanom, apan usahay sa paniguro nga dili maughan ang yuta, masubrahan na nga makadaot na hinuon sa tanom.

Kay nalapokon na, nabanlas na ang mga tabunok, o nutrens sa yuta, ug ang mga ugat, o gamot sab mangalata na.

 Ang angay sa tanom kon kini bisibisan, kanang igo lang mahumod, o makatuhop.

Igo na nga makatuhop ang tubig ngadto sa 1-2 ka pulgada ang gilawmon. Likayan nga magbanaw kay ang mga sustansya sa yuta ug tanom mangahanaw.