Iwit sa turismo

Bisan pa man sa gihingusgan nga kampanya sa kagamhanan alang sa pagdani og mga langyaw’ng turista, nangiwit gihapon ang Pilipinas sa mga nasud sa Asya nga bisitahon sa internasyonal nga komunidad.

Daghan ang hinungdan niini, ug usa na ang pagkawalay maayo nga inprastraktura sa mga lalawigan aron pag-ingganyo og mga turista.

Kon ania na gani sila sa nasud, kadaghanan sa mga langyaw’ng turista moreklamo gayud sa wala’y klaro nga transportasyon ngadto sa mga tourist areas.

Gani, sa niaging semana, samtang nagtan-aw ko’g balita sa TV, usa ka langyaw ang miingon sa dihang giinterbyu siya sa usa ka reporter didto sa Boracay nga kataw-anan ang inprastraktura dinhi sa Pilipinas. Layo ra kuno kini kon itandi sa Thailand ug uban pa nga nasud.

Mao kini ang reyalidad nga angay’ng hatagan og dako nga pagtagad sa kagamhanan. Dili ikalimod nga ang kabati sa sistema sa inprastraktura, ilabi na sa transportasyon, maoy usa sa dako nga babag sa paningkamot nga mapukot nato ang dako nga hut-ong sa turista gikan sa gawas.

Kon ato nga ikumpara sa atong silingan nga mga nasud, layo ra ang Pilipinas sa lumba paghakot og mga turista. Samtang ang Thailand ug Malaysia mohakot na og dili momenos 20 milyones nga langyaw’ng turista matag tuig, ang Pilipinas maglisod pa og kuha sa 7 milyones nga target. Ang pagkawalay disiplina usab sa uban maoy babag sa kalamboan sa kinatibuk-an nga industriya sa turismo. Kini sama pananglit sa pipila diha sa sektor sa transportasyon kinsa kusog kaayo nga mo-take advantage sa sitwasyon.

Dili pa lang dugay, usa ka inila nga Chinese food blogger, kinsa gusto motilaw sa mga pagkaon nga Pinoy didto sa Manila, mireklamo tungod sa kadako sa plite nga gipangayo sa drayber sa taksi.

Tiaw mo na nga gikan sa NAIA Terminal 3 ngadto sa Terminal 4, gipangayoan siya og P2,300 sa wa’y puangod nga drayber. Hangtud nga walay klaro nga reporma nga iimplementar sa kagamhanan, maglisud gayud pagsulbong ang turismo sa nasud.

Hinuon, dili kini kaya sa gobiyerno. Gikinahanglan usab ang dako nga partisipasyon sa tanan nga sektor alang sa kalamboan sa maong industriya.