Subra kabusog, delikado sa init

Wala pa modeklarar ang PAGASA og dry hot season, o ting-init, apan mabatyagan na nato ang hilabihan kainit sa panahon.

Posible kuno nga sa ikaduhang semana pa sa Abril nga modeklarar og summer ang PAGASA tungod kay anaa pa man karon ang hangin nga amihan nga nakatabang og gamay sa pagpabugnaw sa naglagiting nga kainit sa adlaw.

Ang mga eksperto sa panglawas kanunay gyud nga nagpahinumdom sa mga tawo nga maglikay sa mga oras nga hilabihan kainit, gikan sa alas 10 sa buntag hangtud na sa alas 3 sa hapon, kay delikado kaayo.

Gawas sa pagkapagtong sa panit, peligro kaayo sa adunay mga highblood pressure ang pagpainit sa siga sa adlaw. Nasayran usab nato gikan sa mga eksperto sa panglawas nga delikado kaayo ang subra kabusog, unya magbuwad sa init.

Makamugna kuno kini og heat stress ug heat stroke tungod kay sa panahon nga busog sa pagkaon ang usa ka tawo, moinit ang lawas tungod sa paspas nga metabolic activity. Labaw na kon daghan ang protein intake nga makapasamot usab kini sa kainit sa lawas nga mosangpot na hinoon sa heat stress ug heat stroke.

Busa kadtong mga nagtrabaho ubos sa init sa adlaw, hinay hinay lang. Pwede ra man nga mabusog apan dili na pasubrahan aron kalikayan ang disgrasya sa lawas.

Karong Semana Santa, ilabi na ugmang adlawa ug sa Biyernes Santo, pulos painit sa lawas ang sagad himoon sa mga magpenetensya. Busa, likayan nato nga magkaproblema.

Hinoon, bawal man ang magbusog kay panahon man sa puasa, apan dili pud nato hikalimtan ang pagkaon kay basin kita na hinoon ang tabangon kay nakuyapan sa kagutom.

Ayaw gyud kalimot sa pag-inom og labing menos walo ka basong tubig, o mas daghan pa, kay kini maoy usa sa pangontra sa tumang kainit.