Binuhatan sa estado?

Nagkagrabe na gayud kining mga linuog nga pagpatay dinhi sa Sugbo. Gani, maghilak ang adlaw ning panahona kon walay mahagba nga biktima sa pagpamusil dinhi sa Metro Cebu ug tibuok nga lalawigan. Mora’g nahisama na ang Sugbo sa Wild West.

Ang nakapataas sa atong mga kilay mao nga kasagaran sa mga biktima giingon sa kapolisan nga nalambigit sa negosyo sa gidili nga druga. Pipila kanila mga notoryos na sa ilang kalambigitan sa druga kinsa nagbalikbalik na sa bilanggoan hangtod nga naabtan sila sa sanggot sa kamatyon.

Daghan ang nagduda karon nga kini nga mga pagpatay sa Metro Cebu karon binuhatan sa mga vigilante. Kini tungod lagi kay kasagaran sa mga biktima mga badlongon man sa katilingban kinsa nalambigit sa druga, pagpanulis ug uban pa nga krimen.

Hinuon, dili na ikatingala pa kon adunay mga nagpahipi nga mga vigilante dinhi sa Metro Cebu. Daghan kanila ang midagsa dinhi pipila ka tuig na ang nakalabay, ug ubay-ubay tuod ang nahagba kaniadto, ilabi na niadtong nga bugok sa katilingban.

Karon migimaw na usab kining mga pagpatay dinhi sa Sugbo diin kasagaran sa mga biktima giingon nga mga nalambigit sa druga.

Basin baya kon ang estado ra usab ang nagpaluyo niini. Dili nato kalikayan nga daghan ang magduda niini nga binuhatan ra kini sa otoridad.

Dili ba makapahibulong nga kining mga paglikidar karon sa notoryos nga mga personalidad dinhi sa Sugbo misulbong man niining panahon nga gipakusgan na usab sa kagamhanan ang kampanya batok sa ilegal nga druga?

Ug ang labi nga makapahibulong mao nga menos na ang mga pagpatay sa mga drug suspect sa mga operasyon sa otoridad, lahi ra sa pagsugod sa kampanya batok druga niadtong 2016 nga gatusan gayud ang naluthang kay kuno misukol sa mga polis.

Hinuon, dili ikalimod nga daghan usab ang nalipay niining paglampas sa mga sagbot sa katilingban kinsa padayong nalambigit sa druga.

Maayo unta kon mobahag na ang ikog niadtong wala pa maabti sa sanggot sa kamatayon aron aduna pa sila’y panahon nga magbag-o.