Panaw sa pagsakripisyo

MARSO 25, 2018: Domingo sa lukay

Mga Pagbasa: Is. 50;4-7/Sal. 22/Fil. 2;6-11/Mk. 14;1-15;47

Kasagaran kun maghisgot ta Semana Santa mosantop dayon sa atong hunahuna nga kini kasinatian sa pagsakripisyo ug pag-antos. Sa uban panahon kini sa mga wild parties, bikini opens, relax relax ug uban pa. Ang panaw sa pagsakripisyo normal ra gyud nga mahitabo labina sa mga higayon nga anaa ang commitment sa paghimo og maayo tungod ug alang sa rason nga gitawag nilang gugma. Ang Domingo sa lukay sinugdanan sa atong panaw sa pagpatidlum kun unsa diay kadako ang gugma sa Dios alang kanato nga tungod niini gipadala niya ang iyang bugtong anak aron kita maluwas. Kasinatian nga nahitabo 2000 ka mga tuig nang milabay ug mahimong mahitabo sa kasamtangan ug sa umaabot kay ang matag kasinatian sa kagawasan human sa kaulipnan kasinatian man sa kaluwasan. Normal ang pagsakripisyo ug makahuloganon kini labina sa mga higayon nga anaa ang dili hingpit nga kinabuhi....Apan ang panaw sa sakripisyo mahimong makahuloganon kun ugaling himoon nato kini tungod kay mao kini ang pinaka tawhanong rason sa tanang mga butang.