Dili angay’ng panason ang buhok o balhibo

Ang buhok o balhibo, apil kini sa disenyo sa atong pagkabinuhat isip tawo, nga nagsilbe nga proteksyon sa lawas. Ang buhok sa ulo, dili lang kini dekorasyon nga padugang sa kaangayan nato tan-awon. Ang naglabi nga kapuslanan niini, mao ang pagpreserbar sa mahimong direkta nga kadaot sa ulo o sa bagulbagol.

Ang uban, ilabi na ang mga babaye, maulaw kon may buhok ang ilang ilok, ug mao nga pirme nila kini nga barbasan o pangibton aron dili na motubo. Delikado ang ilok nga maoy kinanipsan nga akses aron pagpagawas sa toksik sa makakanser nga elemento. Ang buhok panagang kini nga salaon ug tuhopon niya ang makaayo sa lawas.

Dili lang kini, hasta gani ang buhok sa palibot sa kinatawo, kagisan sa uban, aron lagi dili kuno laksot sa panan-aw. Ania ang katarungan ngano nga atong ampingan ang buhok o balhibo.

Ang buhok o balhibo, nagsilbe kini nga natural nga lubrikante, nga depensa sa grabeng temperatura. Kini ang una nga mosawo nga tuhopon ang grabeng kainit o kabugnaw.

Mopamenos usab kini sa mga epekto sa “environmental stress” nga malikayan ang pagkaluya. Kon kagison ang buhok o balhibo, ang mga gagmay’ng lungag sa panit kapuy-an na sa mga kagaw o bakterya, nga inanay molahugay sa sulod sa lawas.

Kalagmitan sa buhok o balhibo sa lawas nga kanunay kagisan o barbasan, bantang kaayo sa impeksyon. Dili makita sa mata ang mga pinong samad sa tinugkan, nga nagdulot og kadaot sa panit. Kon motubo pagbalik ang buhok o balhibo, imbes humok mogahi na nga managko, nga hait na hinoon hiramon ug mora na og ‘steelbrush’.

Ang pagpaopaw, naghatag lang og higayon nga mas mahasol ka kay dali kana hasolon, mora’g pirme nga init o sapoton, dayon og pangalot bisa’g wa’y katol hangtud magasgas ang ulo nga moresulta sa pagkasakit.