Pagpatrolya mo uy

Dili gyud malikayan ang ‘overloading’ sa mga pasahero sa mga bus atol sa Semana Santa kay sigurado man nga pwerteng daghana sa mga tawo nga mopauli sa ilang dapit sa probinsya.

Gawas lang tingali kon ang mga sakop sa Land Transportation Office (LTO) ug PNP Highway Patrol Group maghimo og operation adto sa mga national highway.

Dili gyud mahadlok ang mga driver ug konduktor sa mga bus nga mopasakay og subra sa ilang kapasidad, kay wala may manakop nila sa kalungsoran.

Ang mga polis sa kalungsoran magsiga ra man ang mata nga magtan-aw sa nagsinardinas na nga mga pasahero.

Pero kon ang mga sakop sa LTO ug HPG magpatrolya sa kalungsoran, siguradong mahadlok ang mga driver.

Kon igo ra gani kamo nga mopasidaan sa mga driver sa dili pag-overloading, aw, ang inyong awhag ipalapos ra nila sa pikas nilang dunggan.

Ambot nganong ang mga sakop sa HPG dili man nimo makita sa mga national highways nga mao man unta kini ang ilang tahas?

Mao bitaw na nga ang ilang unit gitawag og Highway Patrol Group kay sila ang hari sa mga highway.

Unsaon nga anaa ra man sila mag-estambay sa ilang opisina.

* * *

Nalipay ko kay nakasabot na ang ubang maglukat og lisensya sa pagmaneho’g sakyanan nga dili na sila magpunsisok sa mga opisina sa LTO sa buntag lang.

Human nato mapublikar dinhi nga mahimo ra sila nga moadto sa mga opisina sa LTO, ilabi na diha sa mga mall, atol sa hapon, wala na kaayo magmingaw ang LTO panahon sa hapon.

Nagtuo man gud sila nga dili na moserbisyo ang LTO inigkahapon.

Wala sila masayod nga ang mga opisina sa LTO diha sa mga mall kutob pa sa alas 6 sa gabii ang serbisyo.

Ang ako bitaw nga kauban diri sa The Freeman, giubanan nako sa LTO-SM City satellite office mga alas singko na sa hapon. Aw, pwerteng dalia ra nahuman.

Ingon usab niini ang mahitabo kon hapon kamo moadto diha sa LTO-District Office sa Mandaue City nga nahimutang sa JCenter Mall, ug sa Robinson’s Fuente.

Pagka karon, kini pa maoy mga mall nga gibutangan og satellite office sa LTO dinhi sa Sugbo.

Nalipay sab ko kay nakatabang niini sa paghatag og kasayuran sa mga motorista.

Sigurado sab ko nga nangalipay ang mga kawani sa LTO diha sa Cebu City kay naiban-ibanan man ang mga driver nga magpunsisok sa ilang opisina.