EDITORYAL - Panahon na nga magkahiusa

Daghan ang nalipay, ilabi na sa mga politikong kanhi karibal sa partido ni Presidente Rodrigo Duterte, tungod sa pamahayag niini nga kalimtan na lang ang partido-partido ug magtinabangay ang tanan. Sa pagkatinuod, dili tanang kaatbang sa PDP-Laban, nga maoy partido ni Duterte, nga nakahimo og sala sa katawhan.

Kadtong mga sad-an, bisan og asa nga partido pa sila gikan angay gyud nga lutoson, apan kadtong wa’y sala dili unta amongon. Sa social media, ug bisan sa mga mediamen nga pro-administration, kumon na kaayo kining pagtawag nila sa mga dili supporters ni Duterte nga mga “Dilawan,” nga ang gipasabot kolor nga “dilaw” sa Tagalog nga maoy opisyal nga kolor sa Liberal Party nga gipasanginlan karon og mga kahiwian, sama sa kurapsyon ug uban pa.

Karon man gud, kadtong dili mouyon sa gusto sa presidente tawgon dayon nila og dilawan. Tataw kaayo nga kining ubang supporters sa presidente, wala’y mga kabangkaagan o nagpataka lang gyud sa paghimo’g pasangil, tungod ba kaha sa kakuwang nila og kahibalo, kon unsaon pagkumbinsir sa uban. Imbes nga ilang tun-an pag-ayo ang estratehiya aron matabangan si Duterte nga makadani pa sa uban aron suportahan ang mga palisiya ug programang makaayo sa nasud, mangaway na hinuon.

Daghan man gud ang gustong mangombinsir apan dili makamao nga mohatud og hustong inpormasyon, mao nga dili sila masabtan. Kini usab maoy hinungdan sa panaglalis sa managsilingan ug usahay kadtong dili makombinsir, pasanginlan na lang nga dilawan, o “adik.” Imbes magkahiusa ang mga Pilipino ubos sa pagdumala ni Duterte, nagkatibulaag na hinuon tungod niining mga naghinubrang ekspresyon nga kuwang sa preparasyon. Maayo nga si Duterte na mismo ang misulti aron nga mohunong na kining mga “over reacting” niya nga mga supporters. Dako ang kahigayonan nga mabuhat ni Duterte ang iyang mga plano para sa katawhang Pilipinhon kon hasta ang mga kaatbang niya kaniadto mouban sa panon ug motabang kaniya.