Pasado na ang divorce bill

Giuyonan sa 134 ka kongresista ang House Bill No. 7303 – An Act Instituting Absolute Divorce and Dissolution of Marriage in the Philippines, o Divorce Bill. Duna la’y 57 ka kongresista nga nisupak niini.

Ang Divorce Bill naghatag og higayon sa mga magtiayon nga dili na gayud magkasinabot, nga sila magbuwag na lang, ubos sa limitado nga basehanan aron mapanalipdan usab ang ilang mga anak sa kasakit nga mamugna sa panagbuwag sa ilang mga ginikanan, ug pagtugot sa matag usa kanila nga makaminyo pag-usab sa lain.

Ang mga rason ug hinungdan nga mahimong basehanan pagduso og petisyon sa legal nga panagbuwag, ug sa pagpaanular sa kaminyoon nga nakalatid sa Family Code of the Philippines mao nga wala na mag-ipon pa ang magtiayon sulod sa lima ka tuig; ug ang panagbuwag sa magtiayon sulod sa duha ka tuig human ang hukmanan niisyu og legal separation kanila.

Ubang rason mao ang psychological incapacity, kun kakulian sa pagsabot sa epekto sa kaminyoon; ang pag-usab sa iyang ‘gender’ pinaagi sa operasyon, pananglit ang lalaki magpahimo og ‘organ’ sa babaye; ug ang dili na gayud mahilot pa nga kasungian. Kinahanglan nga mohimo og dungan nga petisyon ang magtiayon nga gustong magbuwag.

Ang Divorce nga balaudnon nagmando usab og unom ka buwan nga pagpabugnaw sa mga magtiayon nga adunay giduso nga petisyon sa panagbuwag.

Gipaabot nga ang House Bill No. 7303 nga pasado na sa Kongreso, tukion usab sa Senado, ug gituohan nga makasugat kini og mga pagsupak, busa dili kini dali nga makalusot sa kamot sa mga senador.

Apan kon ugaling makalusot man kini, dili kini makalusot kang  Presidente Duterte kinsa mipadayag na sa iyang pagsupak nga ipatuman dinhi sa nasud ang diborsyo.