EDITORYAL - Silot sa mga polis

Giplano karon ni Mayor Tomas Osmeña nga putlan sa binuwan nga honorarium gikan sa Cebu City Hall ang mga polis dinhi sa dakbayan kon masuta niya nga daghan sila og mga ilegal nga kalihukan. Matag polis dinhi sa siyudad sa Sugbo gigahinan og tag P4 mil nga honorarium kada buwan isip tabang kanila sa City Hall.

Nahunahunaan sa mayor ang pagputol sa honorarium sa mga polis dinhi sa dakbayan human nga nadakpan sa mga sakop sa PNP Counter-Intelligence Task Force ang usa ka sakop sa Parian Police Station nga nangilkil sa ginikanan sa tawo nga iyang gidakop tungod kay matud pa nakalapas sa balaod sa drugas.

Ang plano ni Mayor Osmeña mahimo nga dili makiangayon ngadto sa mga polis nga nagtinarong sa ilang serbisyo ug maamong lang tungod sa binuhatan sa pipila nila ka kauban. Apan ang maong nahunahunaan sa mayor mosangpot usab og nindot nga epekto tungod kay mahimo man nga magbantay na ang mga polis nga walay kauban nila nga maghimo og binuang.

Sigurado nga ang ubang polis diha sa police station makabantay gayud kon ang ilang kauban adunay mga daotang binuhatan, ug kinahanglan nga apil kini nila nga kampanyahan aron matangtang sa serbisyo kay makahatag kini kanila og buling sa organisasyon. Bisan gani ang mga reporters nga nag-cover sa police beat makabantay man sa mga tinonto sa pipila ka polis, labaw na kining mga polis gyud nga sinati sa ilang mga kauban.

Imbes nga sawayon nato si Mayor Osmeña niining iyang plano, angay’ng abibahan ang mayor aron nga kon makabantay siya nga nagkamuritsing na sa mga ilegal nga kalihukan ang atong kapolisan, tumanon niya ang iyang plano. Sa ingon, makadaginot pa og dakong kantidad ang kagamhanan sa dakbayan nga magamit sa ubang proyekto.