Tip kon may moatake

Diriyot gyud ko makasaksi sa usa ka pagpamusil kagahapon sa buntag. Pipila pa lang gyud ka gutlo human nga girakrakan og mga bala ang sakyanan ni Jail Inspector Edwin Sarcon didto eskina V. Rama Avenue ug dalan R. Duterte sa Barangay Guadalupe diha nga nagpaingon ko sa maong dapit.

Wala pa kaayo’y mga tawo didto sa maong dapit, apan ang pipila ka tawo nga didto sa maong higayon naghugop na sa sakyanan sa jail official. Pagtan-aw nako, may buslot agi sa bala sa bildo kilid sa driver mao nga misantop dayon sa akong kaisipan nga gipusil ang sakay niini.

Ang Isuzu MUX nga gimaneho ni Sarcon, diha gayud sa unahan nga bahin duol sa traffic light. Nagtuo ko nga mihunong kini tungod sa stop signal, ug sa dihang mopadagan na unta si Sarcon, diha na nga higayona nga giatake siya sa mga wala hiilhing tawo.

Buyno, lisud gyud tinuod ang pag-alkontra kon may tawo nga masuko kanato ug makahuna-huna nga kita todason na.

Apan mas maayo na lang gyud nga maantigo ka kon unsay angay’ng himoon aron nga makalikay ka, kon may higayon pa.

Dia kining pipila ka sumbanan. Kon mohunong ka sa eskina nga adunay center island, padaplin ug dip-ig gyud sa semento nga maglisud na ang motorsiklo pag-agi.

Abtika ang imong mata, pasiplati kanunay ang imong side mirrors, ug ang front mirror ug kon may tawo nga moduol sa imong nahimutangan, tan-awa ang iyang kamot.

Kon duna ka’y armas, pangandam daan nga magamit mo dayon kini kon gikinahanglan. Kon wala ka’y armas, pangandam nga makapadagan ka dayon sa sakyanan kon makita mo nga mohimo na og daotan ang tawo nga miduol kanimo.

Sagad gyud sa mga tawo nga mopusil, moatake sila nga maghunong ang sakyanan. Apan bisan og magpadagan ka sa imong sakyanan, padayon sa pagpasiplat sa imong side mirror ug panid-i ang mga magmotor nga nagsunod kanimo, ilabi na ang nag-angkas.

Kon makita nimo nga naggunit kini og armas ug pulos kamo nagdagan, mahimo nimo nga kalitan sa pag-desilya, o liko sa wala ang sakyanan kon duol na siya sa imong kilid aron nga matumba ang motor, ug kon may kasugat, sigurado nga sila madam-agan.

Pananglit ikaw ra ang nagpadagan sa karsada, wala ka’y kasugat o nagsunod kanimo, bansaya ang imong kaugalingon sa pagpasayaw sa imong sakyanan pinaagi sa paggabling sa manobela sa wala, ug ibalik dayon sa tuo, kay mao kini ang pang-alkontra kon may magsunod kanimo nga buot moatake.