Hagit kang Duterte

Gihagit gayud si Presidente Rodrigo Duterte sa iyang kampanya batok sa gidiling drugas ug kurapsiyon. Una nakasugat siya og mga pagsaway sa mga human rights advocate dinhi sa sulod ug gawas sa nasud.

Tungod niini, ang presidente nag-atubang og kaso sa International Criminal Court (ICC) nga maoy hinungdan nga gusto ni Duterte nga mobiya ang Pilipinas isip sakop sa nahisgotang organisasyon.

Ang ICC usa ka intergovernmental organization ug international nga hukmanan nga nakabase sa The Hague, Netherlands nga adunay hurisdiksiyon sa pagtaral sa usa ka tawo, o mga tawo sa mga kaso nga Genocide, Crimes against Humanity, War Crimes ug Crimes of Aggression.

Ang ICC mas nailhan kini nga The Rome Statute of the International Criminal Court nga maoy nagmugna o nagpabarug sa ICC. Gimugna kini atol sa gipahigayon nga diplomatic conference didto sa Roma niadtong Hulyo 17, 1998 ug gipatuman kaniadtong Hulyo 1, 2002. Ang Pilipinas usa sa mga nasud nga mipirma sa maong kasabotan.

Ikaduha, gibasura sa National Prosecution Panel sa Department of Justice ang kasong drug trafficking batok sa mga iladong drug personality nga sila si Peter Lim, Peter Co, Kerwin Espinosa, Lovely Impal ug lain pa nga kaubanan.

Tungod niini napangutana ang kredibilidad ni Justice Secretary Vitaliano Aguire II nga matud pa ni Duterte maoy iyang ipuli sa pagpriso sa mga drug personality kon dili makorehian ang hukom sa National Prosecution Panel.

Ikatulo, gipasulod sa Witness Protection Program sa Department of Justice ang gihulagway nga rayna sa pork barrel scam nga si Janet Lim Napoles.

Ang pagkasulod ni Napoles sa Witness Protection Program magsilbe nga timailhan sa paghimo kaniya nga state witness batok sa mga senador, kongresista ug ubang opisyal nga nalambigit sa pork barrel scam.

Sigun sa balaod ang akusado nga mahimong state witness maabsuwelto sa kaso nga iyang giatubang bugti sa pagsaksi sa iyang mga kauban nga akusado. Maayo kaha ni? Mao ni karon ang hagit sa presidente