Walkout ni Del Mar kapildehan sa trapo

Ang mga karaan ug tang-an nga mga politiko sa siyudad sa Sugbo nakakita na gyud og kaparang diha sa Regional Development Council (RDC-7).

Mi-walkout si Kongresista Raul del Mar atol sa full council meeting sa RDC-7 kay wala niya makuha ang iyang gusto, – gusto sa trapo (traditional politician).

Nahitabo ang walkout dihang ang RDC-7 nga gipangulohan sa negosyante ug international designer nga si Kenneth Cobonpue wala moaprobar sa mga ‘depressed’ structure nga gisingit (insert) og kalit sa Department of Public Works and Highways-7 human giduso ni Del Mar nga mahimong proyekto dinhi sa Sugbo.

Ang proyekto nga giduso ni Del Mar mao ang tulo ka ‘depressed structures,’ kun mga tunnel, nga pagatukoron sa tulo ka lainlaing dapit dinhi sa dakbayan.

Tiaw mo na! Wala pa gani kita maluwas sa dakong kalbaryo nga atong nasinati sa nagpadayong pagtukod sa Natalio Bacalso Avenue-F. Llamas underpass, naghunahuna na usab si Del Mar nga maghimo og laing mga tunnel.

Dili kita magpailad sa terminolohiya. Kanang giingon nila nga ‘depressed structure’ gipanindot ra gyud ang ngalan niana. Underpass ra gihapon na, sama nianang sa Natalio Bacalso Avenue nga nakahatag og “stress” sa liboan ka estudyante ug trabahante nga matanggong sa huot nga trapiko nianang lugara hangtud pa sa 2020.

Gawas nianang Natalio Bacalso underpass, naa’y nahunahunaang underpass sa U.N. Avenue sa Mandaue nga gipaabot nga mohimo og carmaggedon sa ikaduhang taytayan paingon sa Mactan.

Kining mga politiko sama ni Del Mar, dili na mohunahuna sa kalbaryong pas-anon sa mga tawo.

Sa Facebook, ang ilang mga troll o mga binayrang tambolero, igo ra gyud motubag sa atong reklamo nga “antos lang!” Paeta, sa 2020 mahuman ang Natalio Bacalso underpass, unya, naa na pud na ang tulo ka underpass sa distrito ni Del Mar, wala pa’y labot nianang U.N. Avenue. Pasalamat lang ta kay wala magpadala sa “pressure” ni Del Mar si Cobonpue.

Hinuon, mibahad si Del Mar nga iyang atngan kining maong proyekto didto sa Kongreso. Yabag! Wala unta niya kini gisulti. Basin og nagtuo siya nga wala’y inpluwensiya si Cobonpue, ug basin nagtuo siya nga hangtud karon, gamhanan pa gihapon siya, ang BOPK, ug Liberal Party.

Panahon na karon sa “kausaban” (change). Mao man gani nga private sector ang gihimong co-chair sa RDC-7 ug wala butangi og politiko nga chairman kay nasayod si Presidente Rody Duterte nga ang RDC-7 gihimo ra ninyong “stamp pad” sa inyong paboritong underpass project nga dili gyud modugang og kapasidad alang sa nagkadaghang sakyanan.