Tsansa sa deborsiyo

Adunay dako nga kahigayonan nga mapasar na gayud sa Kongreso ang balaudnon nga magtugot sa deborsiyo dinhi sa Pilipinas.

Hagbay ra nga nag-ung-ong ang maong Bill sa Ubos Balaybalaoranan ug nga hayag ang kahigayonan niini nga maaprobahan na gayud.

Hinuon, makapaabot kita nga pakusgan sa simbahang Katoliko ug ubang mga grupo ang ilang kampanya batok niining maong balaodnon.

Alang sa kaparian, mopahimangno na usab sila sa katawhan mahitungod sa dakong kadaot nga dala niini sa pamilya. Angay na ba nga mosagop ang Pilipinas sa balaodnon nga magtugot sa debrsiyo?

Tungod lagi kay mayoridad sa mga Pilipino mga Katoliko, ngil-aran ang kadaghanan nga makadungog sa maong pulong. Kini tungod lagi kay dako kini nga supak sa pagtulon-an sa simbahan.

Apan adunay mga sektor nga grabe usab ang suporta sa maong balaodnon. Ilang baruganan mao nga panahon na usab nga hatagan og dakong kagawasan ang mga magtiayon kansang liki sa ilang relasyon dili na gayud mabulit pa.

Sa tibuok kalibutan, ang Pilipinas ug Vatican lang ang mga estado nga wala’y balaod nga nagtugot sa deborsiyo. Bisan pa kadtong mga Katolikong nasud sama sa Espanya, Mexico, Italy, Brazil, Portugal ug uban pa, misagop na man niini.

Tingali, panahon na usab nga mosunod sa bul-og ang Pilipinas. Sa pagkakaron, annulment lang ang paagi nga mawad-an og bili ang kaminyoon sa usa ka magtiayon. Apan kuti kini gawas sa kadugay ug kamahal sa legal niini nga proseso.

Wala’y perpekto nga kaminyoon. Dili gayud kalikayan sa usa ka magtiayon nga moabot ang punto sa ilang kaminyoon nga ang dili nila pagsinabtanay dili na gyud mahilot pa. Ug angay lang sila respetohan sa ilang desisyon nga magbulag.

Wala man siguro’y kabalak-an ang usa ka bana, o asawa kon tugotan na sa estado ang deborsiyo sa nasud. Kay kon magtinarong ug magmatinud-anon lang kini sa ilang kaminyoon, wala’y rason nga i-divorce kini sa iyang kapikas.