Dili ba gud ni maayo?

Gisukna nako si Mayor Tomas Osmeña kon pabor ba siya nga wad-on ang mga ‘pay parking area’ sa mga gagmay’ng karsada dinhi sa dakbayan aron nga moluag na ang agianan sa mga sakyanan.

Gipasabot nako ang mayor nga kon kini himoon, sigurado nga maiban-ibanan ang problema sa trapiko. Dugay na ko nga nag-ingon nga ang usa sa mga karsada nga angay’ng wad-on na ang parking, mao ang V. Gullas Street gikan sa eskina D. Jakosalem.

Apan tan-aw nako, mora’g walay gana ang mayor nga biyaan ang mga parking area nga gipabayran og tag P20 kada oras niadtong mga tag-iya og sakyanan nga moparking. Matud niya nga wala kuno siya mag-apas sa kantidad nga makolekta.

Kon mao na, angay lang nga wad-on ang mga parking area daplin sa karsada kay kana maoy nakahatag og dugang kasamok. Dugay nga makaagi ang mga moagi nga sakyanan kay, tiaw mo, ang V. Gullas Street nga gamay kaayong karsada, gitugot ang parking sa matag kilid?

Para nako, dili maayo ang plano ni Mayor Osmeña nga aron kuno moluag-luag ang trapiko dinhi sa downtown area, did-an na ang mga pribadong sakyanan nga mosulod sa downtown.

Dili man problema kon mosulod sa downtown area ang mga pribadong sakyanan basta adto lang iparada sa parking area nga dili diha sa karsada. Pareho kami sa The Freeman, may grahe man kami para sa among mga sakyanan.

Nasayod ko nga gusto lang ni Mayor Osmeña nga kuhaon ang sentimento sa katawhan kabahin niining maong isyu. Busa, karon pa lang daan, akong ingnon ang mayor nga dili maayo ang iyang nahunahunaan.

* * *

Tinuod, maibanan ang koleksyon sa siyudad gikan sa parking fees kon wad-on ang mga ‘pay parking area’ sa pipila ka karsada. Ang siyudad, pinaagi sa CITOM, mokolekta og mga P3.8 milyones kada buwan, gikan sa parking fee.

Apan hain man diay ang atong palabihon, nga makakuwarta ang siyudad gikan sa koleksyon sa bayad sa pag-parking, o ang paghatag og gamay’ng sulbad sa problema sa trapiko? Bi, hinuktuki kuno ninyo ni.

Problema na sa mga tag-iya og sakyanan ang pagpangita og kaparkingan. Sigurado sab ko nga kon wad-on na sa siyudad ang pipila ka parking area niini sa daplin sa karsada, daghang mga nanag-iya og bakante nga luna ang moaplay nga maghimo sila og ‘pay parking area.’

* * *

Nindot ang nahukman sa City Hall nga pabayron na og business permit ang mga department store nga nagdumala og ‘pay parking area.” Angay lang kay maisip kini nga lain nilang negosyo. Go mayor! Tinud-a gyud ni!