DOJ Sec. Aguirre magresign ka na
ANG pagkakaabsuwelto ng National Prosecution Service sa tatlong pangunahing drug personalities ay dagok sa giyera ng pamahalaan laban sa droga. Ang higit na napahiya ay ang Pangulong Rodrigo Duterte na sa simula pa lamang ay mahigpit na ang pagkasuklam sa bisyo ng droga sa ating bansa. Dahil ang NPS ay nasa direktang pamamahala ng Department of Justice (DOJ) natural lamang na may pananagutan diyan si Justice Secretary Vitaliano Aguirre.
Ang sabi mismo ni Duterte, kapag ang isa sa mga pinalusot na drug suspect ay tuluyang napawalang sala, si Aguirre ang ipapalit sa kanya sa bilangguan.
Marami ang humuhula na sa pangyayaring ito, ano mang oras ay maaaring sibakin ng Pangulo sa puwesto si Aguirre, Kaya ngayon pa lang ay marami na ang nananawagan sa kanyang pagbibitiw sa tungkulin.
Pero ang sabi ni Aguirre, hindi siya magbibitiw. Kung ako si Aguirre kusa na akong magbibitiw sa puwesto para isalba sa kahihiyan ang Pangulo. Katakataka kung bakit naabsuwelto sa prosecution level pa lang ang tatlong drug suspects na sina Peter Lim, Peter Co at Kerwin Espinosa na nauna nang umaming isa siyang drug lord na nagbibigay pa umano ng payola kay Sen. Leila de Lima kaya ngayon nagdurusa sa PNP Custodial Center ang Senador. Kahina-hinala.
Hindi matatapos ang problema sa droga kung may mga awtoridad sa pamahalaan na masisilaw sa kinang ng pera. Ngayon pa lang ay dapat na marahil sibakin sa puwesto ang mga may pananagutan.
- Latest