Daghan gihapong abusado

Maayo tingali nga mosayo pagpatrolya ang special team sa CITOM nga gitugyanan pagpanakop sa mo-counterflow kay daghan kaayong masinupakon sa balaod panahon sa buntag sayo, ilabi na sa karsada diha sa Banawa, Guadalupe.

Samtang kadaghanan sa mga motorista mahadlok na nga mo-counterflow ug anha na gani magsubay ang mga mag-motor, sa kilid nga bahin sa karsada, apan duna gyu’y uban nga wala’y kahadlok nga mo-counterflow gihapon.

Gipahibalo na nako niini si Mayor Tomas Osmeña kon asa dapit ang daghang abusado sa buntag, apan hangtod karon wala pa’y aksiyon. Anaa man gud ko mag-agian sa buntag sayo ug makakita gyud ko sa kaabusado sa ubang magmotor.

* * *

Gidayeg nako si Rengelle Pelayo, ang kanhi konsehal sa dakbayan sa Sugbo nga nagrepresentar kaniadto sa kabatan-onan kay matinagdanon sa mga reklamo. Nakita man gud nako ang video nila nga naghangos sa pagtungas sa bukid aron sa paghatud og mga tambal sa mga beneficiaries sa Long Life Program ni Mayor Osmeña.

Nangutana ko kon unsaon sa pag-avail ang maong programa kay wala man gyud ko makapahimus niini sukad. Gi-chat gyud ko ni Rengelle ug nangutana sa akong address, ug sa mga tambal nga akong gikinahanglan. Kanindot kon ingon niana ang tanan nga mga kawani sa dakbayan.

Nakasabot ko nga si Rengelle maoy gitugyanan ni Mayor Osmeña pagdumala sa programa pagpanghatud og tambal sa mga pasyente. Hinoon, dili kaayo ko kumbinsido nga kada adlaw gyud ihatud ang tambal sa kabalayan sa mga beneficiaries.

* * *

Uy, nganong gipasagdan ra man sa mga opisyal sa Barangay Kalunasan, dakbayan sa Sugbo kining tigbakay nga anaa gyud gihimo likud ra sa ilang barangay hall kada hapon?

Ayaw ko’g ingna nga wala kamo mahibalo niining maong tigbakay Kap? Tell that to the marines. Bati kaayo ang report nga miabot nako kay mao kuno nga wala aksyoni sa mga opisyal sa barangay kay dunay nagdawat og bahin sa kita niini. Tinuod dili?

Grabeha gud ninyo, wala pa ninyo aksyoni ang illegal swertres diha sa inyong barangay, unya gitugotan pa ninyo nga maka-operate ang tigbakay likud pa gyud sa barangay hall?

Mga polis sa Guadalupe, unsa man sa’y inyong gihimo niini? Wala sab kuno mo mahibawo? Pastilan!

Unya, mga polis diha sa Waterfront, ang station 3 sa Cebu City Police Office, palihug og aksiyon sa mikatap nga gambling machines sa likud nga bahin sa karaang provincial jail diha sa Barangay Tejero.

Naa sab kuno sa Barangay Lorega, dapit sa Sitio Itum-Yuta ug sa Riverside.