Sugal sa kinabuhi

Marka bahala ang duwa sa mga Overseas Foreign Workers (OFW) diin nakapusta mismo ang ilang kinabuhi ug ang kaugmaon sa ilang pamilya nga gibiyaan sa pangandoy nga mahaw-as sa kalisod.

Kon swertehon, makahakop sa grasya nga maoy makapaharuhay sa kinabuhi sa ilang pamilya. Apan kon dimalason, kinabuhi usab ang ibayad nga maoy makapahugno sa tanang damgo sa pamilyang gibiyaan.

Sama sa nahitabo ni Joanna Demafelis nga gipatay ug gisulod sa freezer didto sa Kuwait kansang mga agalon ra usab ang mihimo sa krimen.

Gawas kang Joanna aduna pay daghan nga mga reklamo sa pagpangabuso, dili lang sa Kuwait, lakip na sa ubang kanasuran.

Nganong mahitabo man kini sa atong mga OFW? Posible nga ang rason niini mao ang kakulangan sa pagpasabot kon unsa nga kultura ug kinaiya sa mga tawo nga ilang serbisyohan sa nasud nga ilang adtoan.

Dinhi gani sa atong nasud, dili man magkasinabot ang mga amo ug katabang nga pareho ra nga Filipino hinungdan nga mopahawa o papahawaon sa trabaho ang katabang, kon dili mauyonan.

Lahi ang sitwasyon didto sa abroad kay dili makasayon- sayon ang mga trabahante pagpahawa kay nagapos sila sa kontrata.

Sama sa Kuwait, legal diay kuno didto ang pagbaligya sa katabang ngadto sa laing amo, matud ni OWWA Deputy Executive Director-V Arnel Ignacio.

Sa atong kultura, dili kini madawat, kay nahisama sa usa ka hayop nga ibaligya, apan wala gihapon kita’y mahimo tungod kay anaa man sa ilang nasud.

Unta moabot ang panahon nga wala na’y mapilde sa gisudlan nga sugal sa kinabuhi sa mga OFWs, ug makauli sila dinhi sa atong nasud nga dili sinulod sa kahon.