Makapaduka nga sermon

Maghisgot ta’g homily, kining mga sermon o wali sa kaparian panahon sa Santos nga Misa. Nigawas kining maong concern sa nasudnong mga mantalaan, ug lagmit daghan ang nakabasa niini.

Locally, ang atong higalang kolumnista nga si Atty. Frank Malilong mihisgot usab niini, nga matud niya adto siya magsimbahan sa Redemptorista (magkita man gani mi usahay), tungod kay matud niya, ang mga sermon brief ug direct to the point.

Mi-react niini ang Catholic Bishops’ Conference of the Philippines (CBCP) ug mipahinumdom sa kaparian sa giingong ‘gentle reminder’ ni Pope Francis kanilang mga pari nga ang mga homilies “should be brief and not go beyond 10 minutes.”

Atong usbon, kinahanglan mubo ug dili molapas og 10 minutos ang sermon. Kini, aron dili magduka ang manimbahay. Lisud kaayo ni alang niadtong ganahan kaayong magpataas sa sermon, usahay mas taas pa kay sa Misa mismo. Ang uban mora’g dili ganahang moundang pag-sermon.

Headline sa usa ka nasudnong mantalaan, atong kutloon: “Priests get wake-up call vs. sleep-inducing sermons.”

Si Fr. Jerome Secillano, executive secretary sa CBCP nagkanayon, ato na usab nga kutloon: “aside from being brief for practicality’s sake, homilies should not loss its relevance and substance of sharing the Gospel with the faithful.”

Tinuod, sa taas kaayo nga sermon, mag-alindasay ta, dili ta mahimutang, maghuwat kanus-a mahuman ang sermon. Matud pa, ang Santo Papa mismo nakamatikod nga: “some Catholics going to Mass tend to sleep, chat among themselves or take a break to light up a cigarette.”

Hinoon si Secillano mi-eksplikar nga adunay mga bahin sa Ebanghelyo nga usahay dili madala og 10 minutos ang pagpasabut ug pagpatin-aw. Busa molapas gyud og 10 minutos ang sermon.

Dugang mga pahinumdom: “priests need not resort to entertaining homilies to keep their parishioners awake.” Ug ang simbahan, dili usab alang sa ballroon dancing, matud ni Bishop Jose Oliveros, tapus sa usa ka viral video nga nagpakita sa pari nga misayaw uban sa usa ka partner sulod sa simbahan sa Plaridel, Bulacan.

Personal nakong kasinatian nga ang mga sermon sa Redemptorist church kutob ra gyud sa 10 minutos.

Kon molapas man, muabot og 12 minutos. Ako sad nga namatikdan nga ang uban kanila magbasa either sa entire sermon o sa mga notes, nagpasabot nga ilang gitun-an, giandaman ang ilang i-sermon, busa, mubo kaayo.

During weekdays nga Misa, kasagaran tag-singko minutos ra ang gidugayon sa ilang mga sermon, ug direct to the point.