EDITORYAL - Kumbati na g’yud

Klaro kaayo nga nagsugod na pagbigniay sila si Mayor Tomas Osmeña ug si Vice Mayor Edgardo Labella. Kon kaniadto, bugnaw ra ang mayor kang Labella, karon makita nga init na ang tinagdan niya sa iyang bise mayor, ug iya na kining gisugdan pagsaway. Nagsugod kini diha nga nakita ang posibilidad nga silang duha maoy magkasangka pagka mayor sa eleksiyon karong sunod tuig.

Bisan og mapaubsanon ra ang iyang tingog, apan matud ni Labella nga apil si Mayor Osmeña nga mabasol sa grabeng problema sa trapiko diha karon sa Barangay Mambaling ug kanait nga mga dapit, kay gitugotan niya nga makasugod ang tunnel project sa Department of Public Works and Highways (DPWH) diha sa Natalio Bacalso Avenue ug F. Llamas nga wala pa maandam ang diversion roads.

Gusto unta ni Labella nga unahon ang pagpalapad sa karsada nga adto paagia ang apektadong mga sakyanan, sama sa Ganciang Street, Mambaling ug ngadto na sa Sabellano Street nga sakop sa Barangay Quiot, ug lahos na sa Barangay Pardo. Matud ni Labella nga ang laing diversion road nga angay’ng palapdan mao ang Highway Tagonol gikan sa eskina Natalio Bacalso Avenue lahus na sa Barangay Inayawan.

Unang nasuk-an ni Osmeña kang Labella mao ang pag-awhag kaniya nga dili lang paabton og usa ka buwan ang pagtanggong sa mga sakyanan nga madakpan tungod sa pag-counterflow. Matud ni Osmeña nga si Labella nagsige lang og panaway apan wala gyud kini natanyag nga mga sugyot kon unsa’y tukma nga sulbad sa mga problema.

Napanglantawan sa mga ‘political observers’ nga si Labella anam-anam na nga mosunod sa mga lakang ni kanhi mayor Mike Rama nga kaniadto nagpaupoy-upoy lang usab ni Osmeña, apan niabot ra gyud ang higayon nga misukol na sa ilang giila nga ‘mentor’ sa politika.

Nindot kini nga indikasyon kang Labella tungod kay masabot man nga giisip siya ni Osmeña nga higpit nga karibal sa politika. Kon si Labella gitan-aw pa lang ni Osmeña nga usa ka pahoy nga kandidato, sigurado nga dili ra kini tagdon.