Walang pakialam?
Ano ba naman itong si Senador Cynthia Villar, matanong lang kung ano ang kaniyang interes sa isyu ng Boracay, sagot agad niya, “wala akong pakialam!”
Buti na lang nilinaw niya na ito ang kaniyang sagot tungkol sa negosyo ng kaniyang pamilya sa Boracay dahil siya ang punong pakialamera, este mali punong abala pala sa Senado tungkol sa usapin ng pagsasaayos ng buong Boracay Island.
Maliit lang daw ang negosyo ng kaniyang pamilya sa Boracay at hindi naman daw siya nakikialam doon.
Siyempre, hindi din siya dapat pakialaman ng sinumang kamag-anak na bahagi ng negosyo ng pamilya.
Kung ang mga asset ng mga kuwago ang tatanungin, mukhang may problema si Aling Cynthia?
Dahil may interes na nga ang kaniyang pamilya sa Boracay, bakit siya pa ang mausyoso sa isyu?
Kahit hotel o sari-sari store lang ang kanilang negosyo, hindi dapat siya nangunguna sa Boracay isyu.
Sabi nga, ang tawag diyan “delicadeza!’
Napansin lang kasi ng isa nating kuwagong makulit na nangingisay, ang mga pinaggagawa ni Aling Cynthia, at biglang hiyaw niya. ‘eto na naman sila!”
Dahil nga siguro ang kanilang pamilya ay kilalang mga negosyante at pulitika, lagi na lang may duda sa kanilang mga ginagawang serbisyong bayan.
Tulad na lang ni dating Senador Manny Villar, na tinaguriang “Brown taipan” dahil nakahilera na siya sa pinaka-mayamang mga Pilipino, na walang dugong Tsino.
Kahit anong pa-pogi ng kaniyang asawa, laging idinidikit ang kaniyang trabahong political sa negosyo ng pamilya.
Bigla ko tuloy naalala ang “Daang-hari.”Hehehe!
Si Mark Villar naman sinuerte at napasama sa Gabinete ni Boss Digong at ang nakuha pang puesto ay pagiging kalihim ng Department of Public Works and Highways. Haay, buhay nga naman!
Balik isyu tayo kay Aling Cynthia.
Hindi naman daw siya talaga pulitiko kahit senador, dahil tiyak ayaw niyang masabing isang “trapo.’
Basta tuluy-tuloy lang ang kaniyang serbisyo publiko, sabi niya.
Pero hindi naman talaga mai-aalis kay Aling Cynthia ang pagdududa ng ilang mga makukulit sa ating lipunan.
Hindi naman talaga maipagkakaila na lumaki ang kanilang negosyo habang ang kanilang pamilya ay nasa larangan ng pulitika.
Ayos na sa akin ang paliwanag na sa “sipag at tiyaga” nakukuha ang tagumpay sa anumang gawain natin sa buhay.
Para tuloy gusto ko nang maniwala sa dating sinabi ng isang mayamang Senador noong unang panahon ng bigla siyang maiskandalo.
Ano iyon?
Hindi daw nagnanakaw ang mayaman. Ngyak!
- Latest