Yawyaw vs Canlas

Ang kaso ni Myles Albasin nga gradwado sa MassCom sa UP-Cebu dili angayang katulgan sa mga naghunahuna pag-usab sa Konstitusyon.

Usa ko sa dakong suporta sa tinguha nga papason ang Partylist system sa atong Batakang Balaod tungod kay wala kini nahatag nga kaayuhan ngadto sa katawhan, ilabi na ang giprotehian niini nga gitawag sa balaod og “poor and marginalized.”

Kon may silbi pa kining balaod sa Partylist, kining mga pobre ug biniyaan mi-arang-arang na unta ang pagpuyo.

Apan sila nga mga partylist congressmen ug congresswomen ra ang nadato – nakabalay, nakasakyanan, ug nakatigum og kuwarta sa bangko. Ang mga pobre misamot og kapobre.

Si Albasin opisyal sa gitawag og Anakbayan Partylist dinhi sa Sugbo. Unsay nahimo ni Albasin para sa mga pobre nga kunohay gilabanan sa Anakbayan, ang pag-adto sa bukid aron mahimong NPA?

Adunay daghang milaban kang Albasin. Daghan kanila miingon nga walay nahitabo engkuwentro. Ang maayo ani nila maghilom na lang.

Si Mayor Aljun Diamante sa Tuburan, kinsa presidente sa liga sa mga mayor sa Sugbo, makausa mitawag kanako aron pagsulti nga lakip siya gitabangan sa mga walhon ug mga partylist atol sa public hearing kalabot sa Federalism didto sa Kapitolyo.

Dili na angay mahibulong pa si Mayor Diamante anang mga partylist ug mga walhon tungod kay tua kana makapusta sa mga politiko nga hadlok mawagtangan og gingharian kon mapatuman na ang Federalism.

Usa sa gipasupot sa mayor sa Tuburan ang pag-awhag sa mga ginikanan nga bantayan nila ilang mga anak nga dili mahitumpawak sa mga pagpang-recruit sa mga walhong komunista.

Sumala pa niya nga kasagaran sa mga ma-recruit kadtong mga “bright” apan mga dili adunahan nga anaa sa mga state universities and colleges.

Tinuod, sa kaso ni Albasin, nausik ang buhis sa katawhan nga nagasto sa iyang pagtungha sa UP-Cebu.

Mahimo kitang “useful citizen” sa atong nasud bisan kita mobitbit og armas, dili ba?

* * *

Nagkadaghan ang nagyawyaw sa Facebook mahitungod sa kahaguka sa DPWH-7 sa pagplano sa mga proyekto niini tungod kay nakamugna kini og grabeng panaghuot sa trapiko.

Inay makigsabot si DPWH-7 Director Ador Canlas sa mga apektadong sector, nagpalaban hinuon siya sa mga politiko aron dili kuwestiyonon ang proyekto sa U.N. Avenue nga gikahadlokang maghatag og traffic jam sulod sa tulo ka tuig.

Nagtuo tingale si Canlas nga motuo si Secretary Mark Villar sa mga politiko.

Simple ra ang gipangayo sa mga tawo. Nga ipatuman ang traffic management plan sa matag proyekto aron maklaro asa ang alternatibong agianan.

Apan mura’g walay ganang makig-estorya si Canlas sa mga tawo. Hahay! Kuwarta na gani ang nagtangag, maliso pay buko sa kawayan.