Ato gyud nga hawanan

Nalipay ko nga gihingusgan na gyud sa mga sakop sa PROBE Team ang paghawan sa mga aseras sa pipila ka karsada nga giukopar na sa mga mapahimuslanon sa higayon.

Nakakita ko sa Facebook ni Raquel Arce, ang hepe sa PROBE Team sa Cebu City Hall, nga gihawanan niya ang Tabada Street didto sa Barangay Mambaling nga dili na maagian og sakyanan.

Unya, karong adlawa, gikatakda nga ang hawanan na usab ni Raquel mao ang mga aseras sa B. Aranas Street diha sa may Taboan market.

Kanang lugara diha, apil ang Lakandula Street, halos wala na’y aseras kay giukopar na man sa mga tag-iya sa balay nga anaa daplin sa karsada.

Magpasalamat gyud ko, ug makaingon ko nga wala gayud masayop si Mayor Tomas Osmeña sa pagtudlo pagbalik ni Raquel isip hepe sa PROBE Team. Kana kon malimpiyo niya ang mga aseras.

Kaniadtong batan-on pa ko, nakatrabaho ko og sulod sa usa ka semana sa usa ka buhatan og mga balde diha sa eskina Lakandula ug B. Aranas.

Tungod niini, suheto kaayo ko nga ang Lakandula Street, kanang atubangan gyud sa main entrance sa Taboan Public Market, lapad kaayo og aseras.

Karon, wala na gyuy aseras kay ang hakog kaayo nga tag-iya sa balay dihang dapita, miukopar na sa aseras nga giapil niya sa pagkural nga nahimong kabahin na sa iyang balay.

Kining bahina maoy gusto nako nga ibalik sa PROBE aron nga mohapsay ug monindot ang atong siyudad. Kon dili nato kini buhaton, moabot ang higayon nga hasta ang karsada, apilon na pag-ukopar niining mga hakog nga tawo.

Salig kaayo ko ni Raquel nga mahimo niya ang iyang katungdanan, basta wala lang unta’y magdupa-dupa diha sa City Hall nga maoy abtik kaayong molaban tungod sa personal nga interes.

Kon motuo si Mayor Osmeña niining maong tawo, dili na ko mobilib sa mayor. Isip mayor, dili nato trabaho ang paglipay sa pipila lang ka tawo, kon dili, ang kinabag-ang katawhan.

Dili ba diay malipay ang kinabag-ang katawhan kon ibalik nato ang mga aseras nga giilog na unta sa mga hakog? Unya, tan-awa sab ang daplin sa taytayan sa Sanciangko Street.

Gipuy-an na og mga tawo. Nahimo kana kay ang maong dapit nahimo na man nga mingaw, kay wala na man paagia ang mga parada diha.

Unta, kinahanglan nga adunay rota sa jeepney nga paagion dihang dapita sa tulay sa Sanciangko paingon na sa Taboan. Pinaagi niini, mobalik og kaalegre ang maong lugar.