Pabaya

Lima (5) ang patay ug singkuwenta (50) ang naangol sa pagkahugno sa upat ka andanang bunkhouse nga gipuy-an sa 162 ka mga construction workers sa J. E. Abraham C. Lee Construction and Development Inc..

Ang sulti sa taga kompanya, makadaug og duha (200) ka gatus ka trabahante ang bunkhouse ug kompleto ang mga papeles. Apan nahugno kini dihang gikatulgan sa kapin usa ka gatus ka mga construction workers.

Nasuta usab sa taga Office of the Building Official (OBO) nga walay permit gikan sa OBO ang nalusno nga bunkhouse ug dili usab kini haum nga puy-an.

Nunot niini gipaundang sa OBO ang pagtrabaho sa gitrabaho sa mga construction workers gumikan sa kakuwang sa permit bisan pa man lahi kini sa ilang gipuy-an nga maoy nalusno. Pero kun ang DOLE ang imong pangutan-on wala na kinahanglana ang pagpahunong sa gitrabaho sa mga nalusnoan tungod kay dili man ang building nga ilang gitrabaho ang nalusno kun dili ang ila man lang nga gipuy-an.

Kun imo nga tugkaron ang anaa sa huna-huna sa taga DOLE, wala nay labot sa seguridad ug safety standard sa mga trabahante ang bunkhouse nga ilang gipuy-an.

Tungod sa hitabo naglumbaanay sa paghimo og imbestigasyon ang Department of Labor and Employment ug OBO.

Mao lagi ni, mao pay ikarag-karag sa paghimo og pakisusi kun aduna nay mamatay o madisgrasya. Wala gani mamatay ug walay madisgrasya, wala gyuy opisina o ahensiya sa gobiyerno nga magpakabana.

Ambot, mao ba kahay anaa sa huna-huna sa nahisgotang opisina o ahensiya sa gobiyerno nga mabuhi ang mga namatay kun sila mag-imbestigar.

Ang nalusno nga bunkhouse maoy buhing kamatuoran sa pagpabaya sa trabaho sa mga taga opisina o ahensiya sa gobyerno. Ang nahitabo nga disgrasya dili na ni bag-o nato kay kadaghan na kini mahitabo pero sa gihapon ang mga taga opisina o ahensiya sa gobiyerno wala gihapon makakat-on sa mga nangaging panghitabo. Unsa kaha nga disgrasya o kinsa kaha ang makapakat-on ani nila.