EDITORYAL - Problema sa traffic maibanan

Daghan ang misuporta sa sugyot nga dili na butangan og ‘pay parking area’ ang mga gagmay’ng karsada dinhi sa dakbayan sa Sugbo aron nga makatabang kini nga maiban-ibanan ang problema sa trapiko. Angay’ng timbang-timbangon pag-ayo ni Mayor Tomas Osmeña kon palabihon ba niya nga makakolekta og parking fees ang siyudad, apan bugti sa grabeng problema sa trapiko.

Giangkon ni Mayor Osmeña nga ang problema sa trapiko dinhi sa dakbayan apil sa gipangitaan niya og sulbad. Apan wala pa gayud moabot sa iyang malantip nga pangisip ang pagdili na sa pagparking og sakyanan sa mga gagmay’ng karsada aron nga tulin kaayo nga makaagi ang mga motorista. Dinhi sa downtown area, ang dalan Manalili gikan sa eskina D. Jakosalem nahimo gayud nga ‘choke point’ tungod sa pay parking area.

Unsaon, bisan og gamay ra kaayo ang dalan Manalili apan ang masi’g ka daplin sa karsada gihimo pa gyud nga pay parking area ug gipabayran og tag P20 ang kada oras ngadto sa mga tag-iya sa sakyanan nga moparking. Ang kadagkoan sa CITOM wala usab makahunahuna niini tungod kay utro pa nga ang ilang kaisipan ang kuwarta ra nga makolekta maoy gilantaw aron magamit sa pagsweldo sa ilang mga sakop.

Tinuod, kada buwan mokita ang CITOM og mga P3.8 milyones gikan sa makolekta nila nga parking fees, apan wala kini magpasabot nga wad-on na lang gyud ang mga designated pay parking area, kon dili, kadto lang mga gagmay’ng karsada. Dunay mga tag-iya og bakanteng luna dinhi sa dakbayan nga uyon kaayo nga gamiton ang ilang property isip pay parking area, apan unsaon, wala pa kini moabot sa huna-huna sa mga opisyal sa dakbayan sa Sugbo.

Gawas sa paghawan sa mga aseras aron adto na ang mga tawo moagi ug dili na diha sa karsada maglakaw, ang pagdili pagparking sa mga gagmay’ng karsada makatampo gayud aron maibanan ang problema sa trapiko dinhi sa siyudad.