Labella giatake na’g sugod

Matud pa sa uban, nagsugod na gyud og bukal ang “kaldero sa politika.” Dinhi sa dakbayan sa Sugbo, gisugdan na pagsaway ni Mayor Tomas Osmeña si Vice Mayor Edgardo Labella kay sigurado man gyud nga sila ang magkaatbang kon mahinayon ang eleksiyon karong sunod tuig.

Miingon si Osmeña nga wala gyud kuno’y maayong nahimo si Labella sulod sa daghang katuigan nga kini nahimong konsehal ug bise mayor sa dakbayan sa Sugbo. Gidayeg hinoon nako si Labella kay igo ra nga mikatawa ug wala gyud mobawos pag-isyu og sakit nga pulong.

Apan hangtud kanus-a kaha kutob ang pagpailob ni Labella? Mahinumdoman nato kaniadto si kanhi mayor Mike Rama nga bisan pasakitan og sulti ni Osmeña, dili gyud mobawos pagsulti og sakit nga pulong. Apan sa ngadto-ngadto, wala na kini makaagwanta.

Sigurado man gyud ko nga si Labella maoy padaganon sa PDP-Laban pagka mayor dinhi sa dakbayan. Nipahibalo na usab si Osmeña nga siya gyud ang mopapili pag-usab. Apan si Rama, mora’g molansar sab kuno. Aw, kon managan sila si Rama ug Labella pagka mayor, daog na daan si Tommy.

* * *

Sa probinsiya, nagsugod na usab pagbukal ang kaldero sa politika kay may pasiuna na man diay nga kasabotan. Mora’g mobalik man gyud diay si Kongresista Gwen Garcia paglansar pagka gobernador.

Sa ato pa, balik sila’g sangka si Governor Junjun Davide. Maayo sab aron mahibaw-an gyud kon kinsa kanilang duha ang labing lig-on. Sa Toledo, mora’g nakadungog ko nga si kanhi konsehal Ricardo “Kuya Nick” Pepito mobalik sa politika.

Kasaligang tinubdan nga akong nahibaw-an nga nag-agad ra si Kuya Nick sa iyang mga kauban sa politika, apan bukas siya nga modagan pagka mayor ug bise mayor.

Aw, kini hinoon si Kuya Nick, sigurado gyud ko nga dili ni mangawat og kuwarta sa gobiyerno kon mapili, kay pwerteng daghana nga negosyo niini, dinhi sa Pilipinas ug didto sa laing nasud.

Ang mayor sa Tuburan nga si Aljun Diamante nagtinguha usab kuno nga mopapili og taas-taas nga katungdanan. Diri sa Mandaue City, nakadungog ko nga may bag-ong kalamboan sa politika nga naglambigit kanila ni Mayor Luigi Quisumbing ug kanhi konsehal Lolypop Ouano-Dizon.

Dili lang usa nako ibutyag dinhi kay kinahanglang pabukalon nato pag-ayo ang kaldero sa politika. Unya, bahin sa barangay elections, dunay miingon nga mahinayon, apan duna sa’y miingon nga basin og dili.

Para nako, gusto gyud ko nga mahinayon kay aron may bag-ong mandato sa katawhan ang atong mga opisyal sa barangay.