Sugar free nga pagkaon (3)

Tinguhaon nato nga magsusi kita sa mga pagkaon nga dasok sa nutrens, dili ang naandan sa dila nga katam-is. Pugson ug disiplinahon nato ang kaugalingon sa pagbag-o ngadto sa himsog nga estilo sa kinabuhi (healthy lifestyle), kay dili sayon nga maulipon kita sa kaputong hangtud nga mawad-an og paglaum nga mabuhi pa, gumikan kay naugtas na sa grabeng problema sa pagkasakit.

Wala ta’y kapilian kon buot kita nga makalingkawas niini, mao ra nga iprayoridad ang daghang kombinasyon sa resipe nga ginganlan og ‘sugarfree diet.’ Aron dili kita makalitan sa pagsagop niini, sugdan nato pinaagi sa simple nga pagdiyeta sa ginagmay carbo’s, protina sa utanon (veggie) ug sa karne, itlog, isda, mani (nuts), uban pa.

Balansehon kini nga kutob sa mahimo sa usa ka adlaw, ibase lang sa 2,000 kaloriya, nga ang asukar nga konsumohon labing daghan na ang 5-6 ka kutsarita, apil na niini ang mga produkto nga sagad sinambogan og asukar ang mga ilimnon ug mga sitsirya. Hinuon, wa man mag-ihap sa kaloriya ang ‘sugarfree diet’, basta likayan lang ang mga pagkaon nga giproseso, dako na kini og ikatabang.

Dili man kita maperpekto sa pagsunod niini, apan bentaha na lang kay sa wa kita’y gihimo. Busa, kinahanglan lang ang abilidad nga mainampingon sa pagpili sa mga kan-onon.

Ang pagkaon og ‘wholefoods’ (dili mga giproseso), makabenepisyo kita niini gikan sa pagmenos sa timbang, pagka-‘prediabetic’, mga kaluyahon kay pun-on kita sa enerhiya, menos ang risgo sa implamasyon sa paghilis sa gikaon, kalibang, ug konstipasyon.

Posible sab nga momenos ang risgo sa kanser ug  problema sa atay. Ang bugtong solusyon sa gihambin nato nga mga sintomas sa lawas karon, kon matinud-anon ug masunod nato ang ‘sugarfree’ nga mga pagkaon.