Ania nato ang problema

Daghan ang nakapaniid nga nagkahilis na ang sagrado nga espirito sa Edsa Revolution karong panahona ug nagkawala na ang magic paghakot og liboan alang sa kasaulogan niini. Kini kon ang miduyog sa niaging selebrasyon sa People Power maoy atong basehan.

Sa nakalabay nga kasaulogan sa pagkapukan sa diktadoryang rehimen ni Marcos 32 ka tuig na ang nakalabay, gamay lang kuno ang midagsa sa Edsa aron sa paghinumdom pag-usab sa maong makasaysayanong panghitabo nga nahimong modelo alang sa demokratikanhong kausaban.

Apan adunay mga nakapaniid nga mora og milurang na ang kaikag sa mga Pilipino sa pagsaulog sa maong hitabo.

Nagpasabot ba kini nga inanay na kitang mitalikod gikan sa pagselebrar sa kaimportante sa maong malinawon nga rebolusyon nga nakapabilib sa kalibutan sa mga Pilipino?

Kini tungod siguro sa kapakyas usab sa maong rebolusyon paghatag sa mga Pilipino og maayo nga bunga human sa ilang sakripisyo. Buot ko nga ipasabot nga wala miresulta ngadto sa dakong kalamboan sa atong nasud kadtong maong People Power sa Pebrero niadtong 1986.

Dili ba nga sulod sa tulo ka dekada pagbalik sa demokrasya sa nasud, wala gyu’y tinud-anay nga kalamboan ang misakdap  kanato.

Hangtud karon pabilin nga nag-ilaid sa kalisud ang mayoridad sa mga Pilipino. Kini bisan pa man sa daghang eksperimento nga gisagop sa mga nagkalain-laing administrasyon.

Sayang tungod kay wala nato tarunga pagkabayo ang naangkon nato nga kagawasan human sa Edsa Revolution.

Nakadayeg nato ang kalibutan tungod sa atong malinawon nga pagsipa sa diktador apan kulang usab kita sa paningkamot nga moresulta ang pagbalik sa atong demokrasya ngadto sa dugay ra nga gidamgo nga ekonomikanhong pag-asenso.

Tungod niini akong nakita nga ania ra gayud  kanatong mga Pilipino ang problema.

Kita ra usab ang hinungdan ngano nga maglisud kita pagsulbong ngadto sa gidamgo nga kalamboan. Kini gumikan kay wala nato hatagi og dakong importansiya ang nahibalik nato nga kagawasan.

Kitang mga Pilipino ang nagtudlo sa kalibutan unsaon pagkab-ot sa malinawon nga kausaban gikan sa abusado nga pangagamhanan.

Apan salikwaot usab nga paminawon nga kita mismo ang nagkulang sa paningkamot nga mobunga og ekonomikanhong kalamboan kadtong atong mga sakripisyo sa Edsa.