Silot sa mga ginikanan

Ato na nga nahisgotan dinhi nga pipila ka estado sa America nagpasar og balaod nga magsilot sa mga ginikanan sa badlongon nilang mga anak.

Nakalimot na ko kon unsa to nga estado nga aduna sila’y balaod nga nagsilot sa mga ginikanan, kansang mga nag-eskwela pa nga mga anak mo-absent makatulo gikan sa ilang mga klase.

Laing hitabo, usa ka 5-anyos nga bata, naligsan sa usa ka ‘hit and run’ nga sakyanan, ug ang inahan sa bata maoy gisilotan gumikan sa iyang pagpasagad nga maoy nakaingon nga naligsan ang iyang anak.

Sa akong nabasahan, wa man hisgoti kon gisubay ba ang nakaligis sa bata. Ang balita was more on the mother’s neglect, kay sa hit and run nga sakyanan.

Dinhi sa ato, daghan na kaayong kalapasan sa balaod nga nahimo sa linghod pa kaayo nga mga batan-on, apan, wala’y labot ang mga ginikanan niining mga bataa.

Pananglitan, sa among panahon, sa mga bata pa mi, inigbagting sa oracion sa alas 6 sa sayong gabii, hipos na mi. Meaning wala na’y maglaruylaroy nga batan-on panahon sa kagabhion, ilabi na sa late evening.

Ug niadtong panahona, wala pa’y curfew-curfew. Apan karon, daghan na nga mga krimen ang nahimo sa mga batan-on panahon sa kagabhion, despite sa curfew nga gipahamtang sa kagamhanan.

Karon nalipay kita nga may nag-ung-ong na nga balaudnon sa House of Representatives nga magsilot sa mga ginikanan sa badlongon nilang mga anak.

Giingon dinhi nga ubos unya sa nationwide nga curfew, teenagers and children would be kept off the streets during late hours in the evening.

Nindot na ni. Hinaot nga dili kini mahisama sa ubang balaod nga kutob lang sa papel. Wala’y implementation. Ang curfew unya alang sa mga batan-on nagpanuigon og 18 paubos. Kini “to prevent them from becoming vulnerable to the negative influences of street life,” panahon sa kagabhion.

Ang balaudnon giulohan “Unsafe Hours for Children Act” nagpahamtang sa nationwide nga curfew gikan sa alas 10 sa gabii hangtud alas 5 sa buntag. Ug gawas unya sa pagdili sa mga batan-on paglaruylaroy panahon sa kagabhion, ang curfew makapalikay kanila gikan sa daotang mga elemento nga mogamit kanila paghimo’g salaod. Ang silot sa mga ginikanan nga motugot sa batan-on nilang mga anak paglaruylaroy panahon sa gitawag nga “unsafe hours,”:P1,000 ang multa, o  community service sulod sa lima ka adlaw, or both.

Problema ni karon sa pipila ka ginikanan kansang mga anak, gahi og ulo.