EDITORYAL - Abuso sa ngalan sa turismo

Ang Central  Visayas usa sa mga nakaangkon og mga maanindot nga baybayon nga haom alang sa turismo. Kini sama sa Lapu-Lapu City tungod sa kadaghan sa mga beach resorts nga nalibotan og mga mahalong hotel ug duol sa tugpahanan. Samtang sa kalungsoran sa Sugbo, gikan sa Northern Cebu ug Southern Cebu, naay mga maanindot kaayong mga white sand beaches nga namungingi na sab sa mga resorts.

Naa pa usab ang Panglao, sa Bohol nga usa usab sa mga nindot nga tourist destination. Apan kining tanan, wala pa makaapas sa kasikat sa Boracay Islands nga mikita na og binilyon ka pesos ug nakatampo sa paglambo sa ekonomiya sa nasud. Apan ang pangutana, estrikto ba nga gisunod sa mga local government units ang implimentasyon sa Clean Water Act, Solid Waste Management Act ug kining “no-build” zone regulation sa mga baybayon o kalasangan?

Dako kaayo og epekto sa turismo sa nasud kon ugaling tinud-on ni Presidente Duterte ang pagpasirado sa pipila ka resorts gumikan sa paglapas sa environmental laws kay daghan ang nakatrabaho niini.

Mabasol niini kining mga LGUs kay nagmika sila, mao nga nagpaturagas ang mga hakog ug wala’y pagpakabana nga mga negosyanteng resort owners nga gustong mag “upgrade” sa amenities sa mga resorts. Pulos lang kuha ug wala mihatag og balik para sa kinaiyahan.

Dili unta mahisama kining mga resorts sa usa ka kabaw nga naghatag og gatas apan tungod kay wala atimana naluya na lang ug wa na’y ikahatag pa nga gatas. Apan sa kahakog sa tawo, gusto gihapon kini mapuslan pinaagi sa pag-ihaw aron lapaon. Gawas niining mga resorts nga gihimong negosyo, angay pud tan-awon sa DENR kining mga pribadong nanag-iya og mga luna atubangan sa baybayon nga nagtukod og mga kural ug dili na hinuon makalahos ang mga tawo nga gustong maligo sa dagat nga libre.