Hadlok si Tomas kang Labella

Panglubog ra gyud na’ng pagkuwestiyon ni Mayor Tomas Osmeña sa pagka-presidente sa PDP-Laban Cebu City Chapter ni Bise Mayor Edgardo Labella. Tingali hadlok siya nga masubli ang iyang kapildehan niadtong 2013.

Mitingog na si PDP-Laban Committee on Membership Chairman, Tourism Assistant Secretary Daniel Ebarle Mercado. Matud ni Mercado nga dako og plano ang PDP-Laban alang kang Labella, kinsa maoy giila nga labaw sa partido dinhi sa Sugbo.

Pero tay’m pa, nganong masakit man si Tomas kon dili pa tinuoray nga miyembro sa PDP-Laban si Labella?

Una, wala’y angay si Tomas nga mag-apil-apil sa diskusyon sa PDP-Laban kay bisan asa na lang siya naabot aron magpalaban ug makasulod sa PDP-Laban ug aron makapaduol kang Presidente Duterte, wala man gyud siya makasulod.

Ikaduha, loyal man siya sa Liberal Party nilang Noynoy Aquino ug Mar Roxas. Maayong diha na lang siya magpabilin nianang partidoha.

Ikatulo, kon wala siya’y angay kahadlokan nga mapilde unya siya ni Labella, nganong saba man kaayo siya karon? Niadtong Martes, nagpa-presscon siya ug miingon nga dili na siya modagan pagka-mayor, ug si Margot ang iyang padaganon.

Pero gahapon, nakabantay tingali siya nga na-low morale ang iyang mga dumadapig kay ang iyang sulti nga dili na modagan, nahimong senyales sa nagkahuyang nga lider sa BOPK, gibakwi na usab niya.

Dili lang si Labella ang gikahadlokan ni Tomas. Lakip ang gipanglupigan niyang mga negosyante ug mga kapitan nga iyang giatbangan og BMO moalsa batok niya. Kana maoy gikahadlokan niya.

Kay seguro man gyud nga tinguhaon sa SM ug BDO ang iyang kapildehan, nagbirigbirig na pud si Tomas sa mga Gokongwei. Ang wala niya mahibaw-i nga ang usa sa mga Gokongwei, nagkuyogkuyog didto sa China sa labing kontra niya nga tawo dinhi sa Sugbo. Ang wala mahibaw-i ni Tomas nga gi-ulog-ulogan lang siya. Seguradong dili siya kakuha og campaign funds sa 2019 nga eleksiyon.

* * *

Sa Barangay Tisa, naninguha ang kapitan nila nga si Phillip Zafra nga maaspalto ang dalan Cabarrubias. Apan ang anak sa kanhi kapitan nga konsehal karon, gikatahong mibabag nga mapaaspalto ang lugar.

Abi kay kini si Eddie Cabulao mao man ang nagdumala sa Barangay Mayor’s Office diha sa Tisa, iya tingaleng ipakita nga mas gamhanan pa siya kay sa kapitan kay lagi nakalinya man siya sa BOPK.

Kining sama ni Cabulao maoy dili angay hatagan og suporta inig-abot na sa adlaw sa panudya. Kon mobabag lang siya og proyekto aron siya maoy mopasikat, batasan kana sa usa ka tawo nga gahum ug pasikat lang ang anaa sa hunahuna.

Pero dili gyud diay gamhanan si Cabulao. Kay nahinayon man ang pagpa-aspalto sa dalan Cabarrubias.