Asa ang diplom a ni Tomas

Asa ang diploma ni Mayor Tomas Osmena? Mao ni ang pangutana sa grupo nga kontra sa politika sa mayor. Ang pangutana mahitungod sa diploma dili lang ni karon, kon dili, sukad pa kini kaniadtong 1998.

Kaniadtong Pebrero 1, ning tuiga, gisukna ni Konsehal Joel Garganera kon graduwado ba gyud si Mayor Osmeña sa kolehiyo. Karong bag-o, si kanhi mayor Mike Rama na usab ang nangutana mahitungod sa credentials ni Osmeña.

Tungod sa pangutana sa iyang diploma, gihagit og pustaanay ni Osmeña si  Rama. Lima kontra usa, buot ipasabot nga ang P10 mil ni Rama, iyang pustaan og P50 mil aron iyang pamatud-an nga may diploma siya sa kolehiyo.

Gipapili pa sa mayor ang iyang mga kontra kon pila ang kantidad nga ilang gusto sa pustaanay. Una niini, si Osmeña nangangkong gradwado siya sa kursong Agricultural Economics sa Xavier University-Ateneo de Cagayan sa Cagayan de Oro City niadtong 1972, apan wala motuo niini ang iyang mga kontra sa politika.

Gradwado man si Osmeña, o dili, dili kini isyu sa iyang pagka mayor tungod kay dili kini kwalipikasyon sa pagka mayor. Ang diploma sa kolehiyo wala man gani kinahanglana sa tag-as pa nga posisyon sa gobiyerno, sama sa pagka presidente ug bise presidente, pagka senador ug pagka kongresista.

Ang gikinahanglan nga kamao lang mosuwat ug mobasa ang magpapiling opisyal  sa gobiyerno. Wala man gud magpasabot nga kay gradwado ka sa kolehiyo maayo ka na og liderato. Napamatud-an man gud nga dili sukdanan sa maayong liderato ang diploma nga gihuptan sa usa ka tawo.

Hinuon, sa akong tan-aw dili ang paghupot sa mayor og diploma ang gipangutana ni konsehal Joel Garganera ug Mike Rama, kon dili ang pagkatinuod sa diploma nga iyang giwara-wara.