Mipalit og yuta pinaagi sa data-data

Dear Atty. Divine,

Dunay yuta nga 150 square meters, akong gipalit pinaagi sa data-data. Wa’y terms nga nabutang sa kontrata kon pila ka buwan, o tuig impason ang pagbayad, apan dunay selling price og kon pila’y monthly.

Ang gikuptan sa seller mao ra ang Extrajudicial Settlement and Partition with Deed of Absolute Sale. Trese sila ka heirs apan 10 ra ang nakapirma ug dili pa gyud notarized ang Extrajudicial Partition with Sale.

Ang akong pangutana kon balido ba kining maong dokumento? Abogado ba gyud ang angay’ng mohimo sa Extrajudicial Partition?

Ang seller ra ang nagbuhat sa agreement ug wa’y terms, kon ma-fully paid na nako. Pwede ba nga ang seller ra ang mopirma sa Deed of Absolute Sale?  —Ronnie B.

Dear Ronnie B,

Ang kasabutan nga maglambigit og real property kinahanglan gyud nga pirmado sa tanang parties involve ug kinahanglang notarized gyud.

So, kon 10 ra ang nakapirma sa Extrajudicial Partition with Sale, dili kini mahimong binding sa laing tulo ka heirs nga wa makapirma. Busa pwede silang mo-demand sa ilang share ug kon dili notarized ang dokumento, then questionable kini ug dili ma-process sa buyer ang pag-transfer kay ang dawaton sa BIR ug sa Register of Deeds mao man ang notarized nga Extrajudicial Partition with Sale.

Mas maayo nga abogado ang mohimo sa Extrajudicial Partition kay ang lawyer man ang nasayod kon unsay ibutang nga mga terms sa dokumento.

Samtang kalabot sa imong gipalit pinaagi sa pagdata-data, kon imo na  kining ma-fully paid, maglisud gyud ka sa pag-process sa pag-transfer kon dili makapirma ang tanang heirs, bisan kon portion ra ang imong gipalit kay patay na man ang registered owner, so ang mga heirs niini maoy co-owners.

Mas maayo nga moadto ka og abogado aron magpahimo ka og klarong dokumento sa yuta nga imong gipalit sa data-data ug ipakita nimo ang dokumento sa yuta aron magiyahan ka kon unsay angay nimong buhaton? Thanks and God Bless. — Atty. Divine