Mga benepisyo sa mustasa (2)

Ang liso sa mustasa, isip nga nutrisyon, nagbaton kini og dasok sa mga bitamina, minerales, antioxidants ug mga nutrens sa tanom o ‘phytonutrients’. Isip panglamas sa pagkaon, nagbaton sab kini’g magnesium, calcium, selenium, manganese, phosphorous, vita-B complex ug uban pa.

Matagamtaman ang kahalang sa liso sa mustasa, kon kini ligison o dugmokon, o kaha gipulbos nga isagol sa tubig. Ang tibuok nga liso niini (wholeseeds) walay masimhot nga baho (aroma). Ang medisinal nga paggamit sa liso sa mustasa.

Mag-inom og usa ka basong gatas nga sagolan og diyutay nga liso sa mustasa. Popular kini nga pambalay nga remedyo (home remedy), nga paabtik o pagpabaskog sa lawas. Imna kini sulod 15-20 minutos sa dili pa ang tingkaon.

Sa pagmasahe nga gamit ang lana sa mustasa (mustasa essential oil), sa bagulbagol, maayo nga pampatubo kini sa buhok. Sa pagpreparar niini nga prosesoha, magpabukal og tubig nga ilunod ang dahon sa henna, hangtud mora’g dagtum o laya na tan-awon, unya butangan og 25 gramos sa lana sa mustasa.

Pabugnawon dayon salaon ang solusyon, og regular nga ipahid sa bagulbagol, partikular sa dapit nga kaupawon o nanglihang na ang mga buhok. Unya apilan sa pag-inom og tsa sa mustasa (mustard tea), aron paspas ang epekto.

Sa uban nga benepisyo sa liso sa mustasa, sama sa naghuot ang dughan o naglisud sa pagginhawa, maoy gamiton ang dinugmok o pinulbos nga liso  sa mustasa, nga ¼ sa kutsarita niini, nga butangan og igong tubig aron pastahon o maespiso.

Unya kan-a kini human sagolan og honey. Mahimo nga haplasan sa ‘essential mustard oil’ ang dughan, makatabang ni pagpaluag sa pagginhawa.