PCSO ug STL

Daghan karon nga mga Small Town Lottery (STL) outlets ang atong nakita sa kabarangayan sa dakbayan sa Sugbo. Kining maong mga outlets nagbaligya og tulo ka digit sa numero nga susama sa swertres nga gipadagan sa Philippine Charity Sweepstakes Office (PCSO).

Sa akong nahibaw-an, ang STL didto lang kini mag-operate sa Luzon area. Ang STL gimugna sa PCSO isip pang-alkontra sa illegal numbers game nga Jueteng sa Luzon, apan ania na kini karon sa dakbayan sa Sugbo ug labing seguro anaa na pud kini sa ubang dapit sa rehiyon. Ang STL legal kay mugna man kini sa PCSO, ang problema lang kay gisakyan kini sa dagkong sindikato sa ilegal nga sugal. Daghan sa mga STL outlet ang dili accredited sa PCSO kay dili man sila makapakita niini sa ilang operasyon.

Sigun sa akong nahibaw-an, sa hinapos na nga tuig sa administrasyon ni Presidente Noynoy Aquino nga ang First Golden Fortune Corporation nga gipanag-iya ni Kongresista Consuelo “Conie” Sy nga taga Pasay City nga nakakuha og prangkisa alang sa pagpadagan og 3-digit numbers game diin dinhi sa Sugbo sila mi-operate og Cebu Tres apan naundang.

Niining bag-o, usa ka Sinsilyo Corporation ang giingon nga adunay pagtugot nga makapadagan og 3-digits game. Ambot kaha og ila ba kining mga outlet sa Small Town Lottery nga mikalit lang og panubo sa kabarangayan ning dakbayan sa Sugbo.

Sa imbestigasyon nga gihimo sa Kongreso, ang sakop sa Board of Directors sa PCSO nga si Sandra Cam maoy mibulgar ngadto sa publiko nga ang PCSO nakigkumboya sa sindikato sa mga nagpadagan og illegal  numbers game.

Ang pasangil ni Sandra Cam daw sama sa nakakuha og suporta sa kapolisan human sila namahayag nga sa mga ronda nga ilang gihimo sa mga gidudahan nga nagpadagan og illegal numbers game, pakitaan sila og identification card nga giisyu sa PCSO. Nakigkumboya ba ang PCSO sa mga nagpadagan og illegal numbers game?