Hain man diay ang kontraktor?

Nganong nagtagu-tago man kining contractor nga gipadaog sa bidding sa Department of Public Works and Highways (DPWH-7) alang sa underpass project sa U.N. Avenue duol sa ikaduhang taytayan nga nagkonektar sa Mandaue ug Lapu-Lapu?

Hangtud karon, dili makit-an ang tag-iya sa B.M. Marketing nga si Edgar (Garry) Tiu, o iyang consultant, aron makapasabot sa mga tawo sa Metro Cebu nga may andam na nga “contingency measure” engkaso og makamugna og grabeng trapiko ang proyekto.

Kon dili mopatim-aw ang contractor, nagtuo ko nga dili kini maka-handle sa sama kadako nga proyekto. Kon dili kini magpakita sa mga tawo, nagtuo ko nga dili ang maong kompaniya ang mismong mangunay sa pagpatrabaho, kon dili, i-subcontract kini sa laing kompaniya.

Apan sumala sa atong mga amigo nga nakautingkay sa mga dokumento sa bidding sa DPWH-7, wala may binuang sa mga papel sa maong kompaniya. Buot ipasabot nga maayong pagkahan-ay sa mga papeles niini sa DPWH-7.

Apan kon mao na, nganong hadlok man ang maong kompaniya nga mopatim-aw karon nga adunay balido nga kuwestiyon ang mga tawo sa Metro Cebu?

Niadtong miaging semana, nakatambong ko sa meeting sa Metro Cebu Bridge Management Board. Naluoy ko ni Engr. Nonato Paylado nga maoy nalabhan sa tanang kuwestiyon gikan sa board, mga opisyal sa Regional Development Council-7, ug sa business community nga mitambong sa meeting.

Apan nganong si Paylado man? Nganong dili man makig-atubang si DPWH-7 regional director Ador Canlas? Kini si Canlas ra ba gitawag kini sa mga Dutertards dinhi nga “remnant” sa gitawag nila og kulto sa mga “dilawan.” Ug tanang mga proyektong gipangsubasta giingong adto ipang-award sa mga dilawan. Dili na lang ko mag-apil-apil og hisgot nianang dilawan. Ang ako lang, balido nga kuwestiyon ang gipangayo nga “traffic management plan” nga gustong mahibaw-an sa mga negosyante sa dili pa magsugod ang proyekto.

Natuk-an sa makadaghan si Paylado sa dihang gipangutana sa chairman sa bridge board nga si Pericles Dakay nganong ang ilang gibasehan nga study niadto pang 2007 nga karon nagtubo man ang ekonomiya sa Metro Cebu, ilabi na diha sa Mactan island, diin ang Mactan Cebu International Airport nag-expand, mituyhakaw ang daghang hotel ug resort, ug nagkalapad ang paglambo sa MEPZA.

Mismo ang chairman sa RDC-7 nga usa ka international designer nga si Kenneth Cobonpue minawong kang Paylado nga kanang ilang underpass project nga gi-award sa B.M. Marketing dili mao ang design nga ikasarang sa nagkadako nga ekonomiya sa Metro Cebu, ilabi na sa Mandaue, Lapu-Lapu, Cebu ug Consolacion.

Ang maayo niining maong proyekto, isibog una ang pagpatuman mentras wala pa makapatim-aw ang DPWH-7 ug ang contractor, kay kon makasugod na og hatag og kadaot, lisud na nga maapsan ang sulbad.