Way kasulatan sa gidonar nga yuta

Dear Atty. Divine,

Duna ko’y pangutana labot sa Deed of Donation. Ang akong papa tenant sa usa ka yuta. Pagkamatay niya gitanyagan mi og kwarta sa tag-iya kay papahawaon mi ug ang iyang kwarta nga ihatag namo bugti sa mga natanom sa among amahan sa ilang yuta. Apan wa mi modawat sa kwarta ug ang among gipangayo, portion lang sa yuta nga among katukoran og balay. Misugot ang tag-iya ug gisukdan dayon mi og 300 square meters, apan wala mi hatagi og deed of donation.

Unya gibaligya sa tag-iya ang iyang yuta ug milarga dayon kini sa gawas sa pagkahalin na. Akong gisuwayan og duol ang bag-ong tag-iya apan miingon man siya nga dili kuno mi mabalaka kay nagawas na man mi sa iyang yuta. Ang akong pangutana, kinsa man gyud ang angay’ng mopirma sa Deed of Donation? Pwede ba ang ikaduhang tag-iya ang papirmahon? Mahimo ba nga kami ang magpabuhat sa Deed of Donation og igo na lang siya mopirma? Daghang salamat. Virgie

Dear Virgie,

Base sa atong balaod kon idonar ang real property, sama sa yuta kinahanglan nga kini in writing gyud ug adunay acceptance sa gihatagan ug kinahanglan nga notarize gyud, aron kini mahimong valid. Sa imo nga kaso, wa’y Deed of Donation nga gipirmahan ang tag-iya so dili valid ang maong pagdonar. Ang unang  landowner mao gyud ang angay’ng mo-execute og Deed of Donation.

Ang maayo nimong buhaton karon mao ang pagsusi sa tax declaration or title sa property, kon giapil ba sa pagbaligya ang 300 square meters nga inyong gipuy-an.

Kon wa gani giapil, then ang original owner gyud ang angay’ng mopirma kay nakapangalan pa man kini kaniya, apan kon naapil gani sa pag-transfer  sa nakapalit  ang portion nga inyong gipuy an, mahimo kang mohangyo sa second owner sa pagpirma sa Deed of Donation sa inyong gipuy-an kay nakapangalan na man kini kaniya. Mahimo ra nga magpahimo ka og Deed of Donation sa imong abogado aron igo na lang unya siyang mopirma. Atty. Divine