Mga benepisyo sa luy-a (2)

Kasumpay sa problema sa baga, ang pagsagol sa tagsa ka kutsara sa luy-a, honey ug fenugreek, presko o pinulbos sa usa ka baso nga init-tubig, dako sab kini nga alibyo niadtong giugtas sa grabe nga hubak.

* Pampahilis sa kinaon (digestion) — Ang luy-a maayo sab ni nga pampahilis ug pagtunaw sa kinaon niadtong wala sa kondisyon nga hilison ang kinaon kay adunay kapasidad ang luy-a nga makatabang sa ‘gall bladder’ pagprodyus og igo nga apdo, aron magamit sa pagpahilis.

* Kanser — Nasulayan na ang abilidad sa luy-a, sa pagsanta batok sa tanan nga klase sa kanser, sama sa suso, ovarian, prostate ug kolon.

Nadiskubrehan sa researchers sa Michigan University, nga ang pinulbos sa luy-a, makapatay sa mga selyula nga kanser ug epektibo sab kini nga panglimpyo sa mga toksik sa lawas.

* Kalipong sa chemotherapy — Epekto kini human sa pagkemo, sagad malipong o kasukaon ka. Sa ‘American Society of Clinical Oncology’, sa ilang panagtigum sa Florida, matud ni Dr. Julie  Ryan, 70% sa gikemo nakasinati gayud og sintomas sa pagsuka ug panlipong. Niini, dako ang tabang sa luy-a nga kini maalibyohan. Unsaon ang pagkonsumo niini – sa nag-edad og dos anyos pataas, ug sa hamtong kinahanglang dili molabaw sa upat ka gramo kada adlaw. Sa nagsabak o nagpasuso, dili sab molabaw sa usa ka gramo kada adlaw.

* Anti-implamasyon —Ang luy-a naghatag kini’g elemento sa pag-alibyo gumikan sa implamasyon.

Segun sa pagtuon sa Michigan Medical school, ang luy-a o ang food supplement niini, epektibo sa pagmenos sa risgo sa colon kanser, matud ni Dr. Suzanna M. Nick, kaabag sa research.

* Pamenos sa panakit — Pang-alibyo sab ni sa artraytis sa kabukogan ug kaugatan o rayuma. Unsa ma’y angay nga buhaton niini? (Sumpayan)